ZALEN October 10, 2024 : Vawiin khan Mizo Zirlai Pawl, General Headquarters Executive Committee Meeting vawi 636-na chu MZP Conference Hall-ah neih a ni a. Meeting ah hian, Commerce & Industries Dept. hnuaia hnalak chungchang bakah pawl chhung thil pawimawh an rel a. Meeting hi H. Lalthianghlima, President-in a kaihruai a ni.

Meeting hian Commerce & Industries Dept. hnuaia Asst. Marketing Inspector post-1 ruak hnawhkhah nana ni October 6, 2023-a advertisement tihchhuah tawh. Written Exam pawh ni July 19, 2024 a neih fel tawh. Hna diltu mi 102 atanga mi 10 interview tura koh ten interview tura Commerce & Industries Secretary Room an thlen tawh hnua, hna cancel thut a nih chungchang a ngaihtuah. October 16, 2024 ral hma ngeiin Interview tura koh tawh mi 10-te chu a ngai anga interview kalpui a nih theihnan a hmala tur in a phut a, ni 16 ral hma a hmalakna a awmlo anih chuana tul angin, zirlaite leh thalai hna zawng mekte thlavang hauh turin na zawka hmalak nise tiin rel a ni.

Meeting chuan dan zawm kim loh chhuanlama zirlai hna zawng mek mi 100 chuang te inbuatsaihna holam taka tithlawn a, hna zawng mekte ti hnual thei zawnga Commerce & Industries Department thiltih hi sut leh turin department hotute a phut.

"Tute emaw thun tuma hmalakna ni thei tur anga department hmalakna hi chhunzawm lo turin kan ngen a. Commerce & Industries changtu Minister F.Rodingliana pawh a department chhung a hetiang harsatna thleng hi rang taka hmala nghal turin MZP chuan a phut bawk a ni," an ti.

MZP chuan Minister leh department thuneitute a lo ngen tawh chunga, hmalakna leh bawhzuina a awm loh avangin, October 16, 2024 thleng a ngaichang leh dawn a. Thu lawmawm a awm loh chuan na zawkin hmalak an tum tih an rel.

Meeting-ah hian, kum 2024- 2025 term chhung atan a Appointed Secretary 11 te ruat thar an ni bawk.