Canelo Alvarez chuan Caleb Plant hnehin pound-for-pound lal a nihna a sawh nghet zel a, tunah hian super-middleweight huangah world title pali WBA, WBC, IBF leh WBO lai kawlin ropuina dawh sanah a thu mek a ni. 

Boxer ropui Canelo-a'n a ngam loh awmchhun leh amah aia an dan san, Floyd Mayweather meuh pawh khan hetiang record ropui belt pali zet hi chu a hreng bik miah lo thung. Kum 23 mi chauh a nih lai 2013 daih tawha an inhnek result kha chu an pahnih kara ropui zawk thlan nana tehkhawng rin tlak ber erawh a ni tawhlo tih a chiang a, a chhan pawh Canelo hian kawng hrang hrangah hmasawnna tam tak a neih belh tawh a ni. Tunah hian Canelo hian Mayweather-a'n world champion ni tura mi a hneh zat kha a hneh ve tep tawh a ni. Mayweather khan a hun chhungin boxer 50 tumin a hneh vek a, chung zinga fight 22 zet chu world champion a nih hum him nana a hman a ni. 

Mayweather-a hneh zat hi thenkhat chuan 23 nia sawiin 1998 kum a IBO champion lai Tony Pep kha chhiar tel tur niah an ngai. Plant a hneh khan Canelo hian world champion ni turin boxer 16 a hneh ve chiah a ni. Thenkhan chuan Mexican boxer hneh zat hi fighter 18 tur niin an sawi ve bawk. Austin Trout leh Rocky Fielding a hneh kha chhiar tel turah an ngai a, mahse anni a hneh lai khan WBA champion kawnghren hrengtute chu Miguel Cotto leh Callum Smith te an ni thung. Canelo a chak zat hi 16 anga chhiar a nih chuan Mayweather aiin 6-in a la tlem tihna a ni ang.

Kumin kum tir lam khan Mike Tyson nen an podcast tumin, Canelo hian Mayweather nen an inhmachhawn kha a sawi chhuak a,"Floyd ka tum khan hmasawnna tur tam tak ka la nei tih ka hria, kha inbeihnaah kha chuan chaklo zawkah pawh a ka inngai lo. Kha inhnek atang khan ka inzir ve chauh zawk a ni," a ti.