Cannes Film Festival hi khawvela film festival lian leh lar ber tih ngam a ni - chu tah chuan Mizo pahnih Aldrin Zosangliana and Napoleon RZ Thanga te an tel dawn. Miss World 2017 Manushi Chhillar te nen an telho dawn tihna a nih chu!

Cannes Film Festival hi khawvel huap a ni a, a telte pawh a tha leh lar ber berte an ni thin. Cannes Film Festival 2023 hi French Riviera-ah May 16 - 27 chhungin neih a ni dawn a, Mizo film maker Aldrin Zosangliana leh Napoleon RZ Thanga te pawhin France an pan mek a ni.

Mizo Film Forum (MFF) vice President Aldrin-a leh Napoleon-a te hian visa an nei thei lawk lo a, an bei pawh a dawng hman lek lek. Mahse hun tep ter tawh takah visa an hmu thei hlauh a, nimin khan Kolkata atangin Delhi an pan a, vawiin hian Cannes lam an pan leh dawn a ni. 

Ministry of Information and Broadcasting (India) chuan he film festival-ah hian state hrang hrang atangin mi pahnih theuh tel turin ruahmanna a siam a, an kal man zawng zawng pawh a tum sak vek dawn. I&PR (Mizoram) chuan Nodal Department a nih angin a hnuaia in register Mizo Film Forum (MFF) chu a tel tur thlang turin a ruat ve leh a, MFF chuan an member Aldrin Zosangliana leh Napoleon RZ Thanga te hi a thlang ta a ni. 

Cannes Film Festival 2023-ah hian Bollywood atangin - Anushka Sharma, Aishwarya Rai Bachchan, Vidya Balan, Sharmila Tagore, Deepika Padukone, Priyanka Chopra, Sonam Kapoor, Mallika Sherawat, Pooja Hegde, Hina Khan, Tamannaah Bhatia leh Aditi Rao Hydari te pawh an tel dawn a ni.