Camera siam chhuaktu company lian Canon chuan an model chhuan vawr EOS R6 Mark II chu India ramah an tlangzarh leh ta rup mai le - a body chauh pawh Rs. 2,43,995 man lawih a ni hem mai!  

Canon EOS R6 Mark II hi kum 2020-a an lo tihchhuah tawh EOS R6 upgrade a ni a, changtlung leh tha zawkin an rawn chhawp chhuak leh ta a ni. Canon-ah chuan an chhuanvawr ber a ni a, a man pawh a theu neu lo viau mai. EOS R6 ai khan - 
sensor resolution, auto-focus, video recording leh thil dangahte belhchian a dawl leh zual zawk a ni. Canon EOS R6 Mark II hi 24.2-megapixel sensor, 40fps (electronic shutter), 4K 30fps video recording a ni.  

Japanese company lar Canon hian lens thar - RF135mm f/1.8L IS USM prime lens an tlangzarh nghal bawk a, hman tlak hle tura ngaih a ni. 

EOS R6 Mark II body hi India-ah chuan Rs. 2,43,995 man a ni a, RF24-105mm f/4L IS USM premium kit lens nen chuan Rs. 3,43,995 a kai thung. RF24-105mm f/4-7.1 IS STM kit lens nen a tlawm leh hret a, Rs. 2,71,995 velin a lei theih. Hetih lai hian an lens thar RF135mm f/1.8L IS USM prime lens chu a mal pawhin Rs. 2,19,995 a ni hem mai - a man hmeh chhuah a huphurhwm viau mai lo'ng maw?

Canon EOS R6 Mark II hi 24.2-megapixel full-frame CMOS sensor a nih laiin, EOS R6 kha chu 20-megapixel sensor a ni thung. ISO range (100 - 1,02,400) erawh a ngai thung a, video-ah chuan ISO range hi (100 - 25,600) a ni. An body design chu a la inang viau a, OLED electronic viewfinder + 3.69 million-dot resolution bilh a ni leh bawk.