September 5, 2023; Nizan 4. 9. 2023, dar 7 vela Siahatla chhak lawk Tisòpi penga Car accident chu vawiin tlai 3:30 velah khan hmuh niin, mi pahnih an thi a, hliam tuar pakhat a awm.

Thu lakna in a tarlan danin, he chetsualnaa telte hi:- (1) E. Vanlalchhuana (52) S/o Khuperha (L) Siahatla (Motor neitu leh Driver a ni a, a hmuna boral)

(2) FC. Lalhnehpuia (46) S/o F. Haichema (L) Siahatla (A hmuna boral)

(3) N. Latha (45) S/o N.Laihia (L) Suahatla, ( Ani hi dam a ni a, district hospital ah admit a ni) te an ni.

An chetsualna hmun hi Siahatla chhak lawk a, Sangau road atanga Tisòpi peng zau lai takah a ni.

Nimin tlai thimhlima an leng chu an haw tak loh avangin chhungkuain an zawng ru reng a, an awmna chin an hriat tak mai loh avangin, vawiin chhun khan NGO te an hriattir a. Anni hian an rin zawn ta a, an veng chhak lawkah an liamna hnu niawm tak an hmuh atangin an chetsualna ni ngeia an rin avangin an belchiang a, an chetsualna ngei a lo ni tih finfiah a ni.

An chetsualna lai hi kawngpui zau lai tak a ni a, kawngthlang lamah hian Lungpui lian tak pawh a awm nghe nghe a, hemi a sut hnu hian motor hi a inletliam ta a nih rin a ni. Car neitu boral ta E. Vanlalchhuana hian a Car hi a lei thar a ni a, khalh a zir mek a, a la khalh thiam chiah lo deuh nia hriat a ni.

Dam a an hmuh N. Latha hi motor tanna chhak lawkah hmuh niin, nizan zankhua a a awm hnuin vawiin lam pawh nilengin awmhmun pawh insawn hlei thei lovin a lo awm a, zawngtute hian an zuk hmu a ni.

District Hospital Siahaah admit nghal a ni a, a dinhmun a hlauhthawn awm lutuk lo nia hriat a ni.

An chetsualna hi ram chhengchhe lai tak a ni a, kham chhawrdawh sang tak te chu awm lo mahse, mihring tan pawh lum sual hlauhawm tak a ni a. Motor tanna hi kawngpui atang mtr. 500 vela thui a nih rin a ni.

(Thlalak : Tisopi khua)