Aizawl October 6, 2024 : Mizoram sawrkarin ration buhfai (card var/(Non-National Food Security Act) man a tihsanin kohhran buhfaithamah nghawng a neih rin a ni a, hemi chungchangah hian kohhranten tun dinhmunah thutlukna la siam lo mah se ration buhfai man mila buhfaitham kalpui hun a la awm ngei rin a ni.

ZALEN-in kohhran buhfaitham lam buaipuitu, Central Kohhran Hmeichhe hruaitu thenkhat a biakte chuan Presbyterian Kohhranah chuan buhfaitham man chungchang chu bial thuneihna a ni tih an sawi a, bial committee-in mahni bial dinhmun thlirin a man an bituk thin niin an sawi.

Mizoram sawrkarin ration buhfai (card var) man a tihsan dawn avanga buhfaitham hralhna man tur chungchangah hmun hrang hrang atangin zawhna an dawng thin tih Central Kohhran Hmeichhe Committee hruaitute chuan ZALEN an hrilh a, chungah chuan central committee-in thuneihna an neih loh thu leh Synod Executive Committee (SEC) pawmpui angin bial thuneihna a nih thuin an chhang thin tih an sawi.

Thudawnnate chuan buhfaitham hralhna man chu ration buhfai rate mila siam a ni tlangpui tih an sawi a, an mi mal rin danah, tuna ration buhfai man tihsan tur hian ration buhfai manah nghawng a nei mai thei a, tun thut thut a nih loh pawhin, ration buhfai mila kal hun chu a awm ngei a rinawm thu an sawi.

Thudawnnate chuan buhfaitham lakkhawm chu kohhran miten an la hlut hle tih sawi bawkin, tun dinhmunah a tlangpuiin kg-ah Rs. 15-a hralh a ni a, hralh zawh theih loh a awm ngai lo niin a sawi.

Buhfaitham hralhna man chungchangah hian Baptist Church of Mizoram hnuaia Baptist Kohhran Hmeichhe Pawl (BKHP) hruaitu thenkhatte chuan tun dinhmunah chuan a hranpain committee-in ngaihtuahna an la seng lo tih ZALEN zawhna chhangin an sawi.

Mizoram sawrkarin a ruahman angin October 1, 2024 atangin ration card varte tana ration buhfai khul man chu kg. khatah Rs 30 a ni tawh dawn a. National Food Security Act hnuaia tel lo, ration card varte tana buhfai man tihsan chungchangah hian FCSCA department chuan September 24, 2024 khan hriattirna a lo chhuah tawh a ni.

Retailer-ten kudam atanga card varte tana buhfai an khulna (leina) man tur chu quintal khat Rs 2,850 a ni tawh dawn a, card var neiten kg. khat Rs 30-in an khul tawh dawn a, retailer-te lawmman pawh Re. 0.50 atangin Rs 1.50-ah tihsan a ni a. Ration buhfai man tihpun hi card var tan chauh a ni a, card pawl leh card eng neite buhfai man erawh tihpun a ni lo.