Manchester United chuan hun eng emaw chen an lo hel tawh, Brazil midfielder Casemiro chu Real Madrid atangin an lalut thei dawn ta a, club pahnih in remna ang chuan United hian pound maktaduai 70 an pek a ngai dawn a ni. 

Kum 30 mi hian 2013 atang khan Real hi zawmin hlawhtlinna hrang hrang a chang tawh a, chung zingah chuan La Liga title tum thum leh Champions Leagues vawi nga.

An inrem dan chuan Casemiro manah hian £60million bakah add-ons atangin £10million an pe ang a, kum li atan contract a sign ang. Tunah United hi table mawng phahah an awm mek a, zanin zanlai hian club tha Liverpool an hmachhawn dawn a ni. 

United player ziah luh thar palina Casemiro hi player thar zingah chuan a to ber a, amah hmain midfielder Christian Eriksen, full-back Tyrell Malacia leh defender Lisandro Martinez te an lo lalut tawh a ni.

Juventus player Adrien Rabiot nena an inbiakna a tlawlh rualin United lam hian an midfield chak lohna ti phui turin Casemiro an rim nghal a, an hlawhtling ta a ni. 

Tuna an inremna vang hian Barcelona midfielder Frenkie de Jong lei an tumna chu an chhunzawm zel dawn nge a hriat loh. Transfer window khat chhung hi chuan De Jong leh Casemiro te hi an lak rual a rinawm chiah lo. 

Zanin Liverpool an hmachhawn hun a tel tir hram an duh tehreng nen an khaw muan deuh avangin Casemiro hi an chhawr hman dawn ta lo a ni. 

Midfielder zingah Brazil international hian block a ngah ber a, tackle tam lamah Barcelona player Sergio Busquets a dawt a, overall possession bikah pathumna a ni phak a, pakhatna chu Real Sociedad duhlai Mikel Merino niin Busquets-a'n a dawt. Passing neih tam lamah pangana a ni a, central midfielder zinga shot ngah ber parukna a ni bawk. 

Casemiro hian 2014-15 khan loan hmangin Porto-ah a khel a, a kum leh atangin Real Madrid lamah a khel tan a, game 222 khel hmanin goal 24 a thun a ni.