Aizawl: Sawrkar laipui ruahmanna angin Mizoram sawrkar chuan pawisa note tel lova thil lei leh hralh 'Cashless' turin hma a la mek a, hei hi a taka kalpui anih hun chuan sum bothlau tur nasa takin a veng dawn a ni. Zalen zawhna chhangin Finance Secretary Lalropara chuan Cashless tur hian sawrkar chu a inbuatsaih mek tih Zalen a hrilh a. Department leh department indawrna bikah chuan harsatna a awm lova, mahse sawrkarin mipuia sum a pekchhuah thenkhat leh mimal indawrna chungchangah chuan harsatna a la awm deuh dawn niin a sawi. Information, Communication & Technology Secretary C.Lalhmachhuana pawhin ataka cashless kalpui hunah chuan ni za inhlawhna, IAY, scholarship leh thildangte a dawngtu tur dik tak ten an dawn tawh dawn avangin corruption nasa takin a veng dawn niin Zalen a hrilh bawk. ICT department chuan Mizorama Cashless kalpui dan chungchangah hian mipui hnenah zirtirna an pe mek a. Mizoram district 8 a district manager te, common service centre 136 bakah mi hrang hrang 2554 te hnenah zirtirna an pe tawh a, heng mite hian midang an zirtir chhawng veleh dawn a ni. Zalen in mipui nawlpui tana cashless a hlawkna tur zawhna chhangin ICT thawktute chuan, "Bank ah sum a awm tam dawn avangin mipui tan sum puk tur a tam dawn a, sum chheprelh tur a van dawn bakah income tax atangin sawrkarin sum tam zawk a hmu thei dawn a ni," an ti. Cashless hi a taka kalpui anih hunah chuan pawisa lem lengvak a awmlo ang a, hun rei tak tak Bank a pawisa dah leh lachhuak tura intlar a ngai tawh dawn lova, Bank inhawnloh ni leh zanah pawh awmhmun atangin sum a khawih reng theih dawn a, sum dawngtur dik takte Account ah sum a lut chat chat dawn avangin sum bothlau a awm dawnloh bakah corruption a tibo thei tura ngaih a ni. Cashless hi a hlawhtlin hunah chuan kumtin sawrkarin cheng vaibelchhe 36000 a hum thei tura chhut a ni. Cashless atan hian hmanraw chi hrang hrang Banking Card, USSD, AEPS, UPI, Mobile Wallets, Pre-paid Cards, Point of Sale, Internet Banking, Mobile Banking leh Micro ATM te hman a ni. Cashless leh Mizoram Mizoram ah hian khua 705 awm anga ngaih a ni a, Bank 16 inbunin Branch 188 a awm mek a, chhungkaw 112716 in Bank Account an nei anga chhut a ni. Cashless hmang tangkai turin Bank Account, UID/Aadhar te neih a ngaih bakah Mizoram ah chuan Mobile Phone te a tangkai dawn a. Bank awmlohna khua ah pawh Common Service Centre (CSC) te chu Bank ten Bussiness Correspondent ah hmangin Bank Account a hawn theih dawn bakah pawisa dah leh lakchhuah nan a hman theih dawn a ni.