Aizawl; Mizoram Lokayukta din a nih atangin CBI chhuitir turin case 3 ah order chhuah a ni tawh a, heng zingah hian Mizoram sawrkarin case 1 CBI chhui phalna a pe a, case 2 ah te chhui phalna a pe lo thung.

Assembly budget session neih mekah Serchhip bialtu MLA Lalduhoma zawhna, Vigilance department changtu Chief minister Zoramthangan ziaka a chhan danin, CBI chhuitir tura order chhuah tawh te chu - Aviation Wing, GAD a sum tih ching penna chungchang (MLC-3/2019), Lawngtlai By-pass road siamna tura sum hmandik loh chungchang (MLC-19/2020) leh Mizoram Rural Bank, Serchhip, Serchhip Branch a sum eirukna chungchang (MLC-31/2021) an ni.

CBI hnena chhui phalna pek a nih loh chhan Chief minister tarlan danin, chu ACB, Mizoram in Preliminary enquiry rintlak takin a kalpui a. Report a thehluhah sawrkar pawisa tih tham fe khawih chingpen a nih thu chiang taka tarlan a ni a, investigation puitling ti chhunzawm tura Lokayukta in thutlukna a siam in a nemnghet bawk.

Hetihlai hian India ram pum Covid 19 pandemic in min tihbuai mek avangin hnuchhuina a ti thuanawp viau tura ngaih a ni a, thudik haichhuah a timuang viau dawna hriat a nih avangin CBI chhui rem tih a ni ta lo a, hei bakah hian ACB chu full investigation ti tura a rintlak tho vang a ni.

Case pakhat zawkah ACB, Mizoram preliminary enquiry report atangin sawrkar tan sum bothlau hmuh tur a awm lova, heng pawisa te hi sawrkar account ah a interest nen thlap deposit a ni. Thil tisual a puh in pawisa a hlawkna hemi sum chevelah hian a neilo.