ZALEN November 30, 2025: Mizoram Lokayukta chuan din a nih tirh atangin thubuai 87 an ziak lut tawh a, chung zinga thubuai pahnih chu Central Bureau of Investigation (CBI)-in an chhui mek.

Mizoram Lokayukta tar lan danin thubuai an ziah luh tawh zawng zawng zinga thubuai pahnih - Serchhip leh Champhaia Mizoram Rural Bank-a sum tihchingpen thubuai te chu CBI-in an chhui mek a. Hetihlai hian thubuai an ziah luh zinga chhui zui ngai nia hriatte chu Anti Corruption Bureau (ACB)-in an chhui tlangpui thin.

March 11, 2019-a Mizoram Lokayukta a taka kalpui a nih atangin thubuai an dawn zinga 12 chu chhui zawh a nih hnuah court thutlukna siam turin chargesheet thehluh a ni tawh a, thubuai paruka hming langte chu court-in thiam loh a chantir.

Thubuai pakua chu zir chian a nih hnuah preliminary inquiry neih ngai loah ngaiin tihtawp a ni a, thubuai pakua dang chu preliminary inquiry neih a nih hnuah chhui zui zel tul loah ngaiin tihtawp a ni.

Thubuai an dawn zinga pariat chu hearing an neih hnuah tihtawp a ni a, panga chu regular investigation tih a nih hnuah tihtawp a ni thung.

Thubuai pali chu disciplinary proceedings tih tura thutlukna siam a ni a, thubuai pahnihah court-in thil tisuala puhte chu thiam lohna nei loa a hriat avangin hrem nei loin thubuai a titawp.

Mizoram Lokayukta-a eiruk thubuai thehluh hi lehkha pheka ziakin Mizoram Lokayukta office-ah pisa kai chhungin thehluh theih reng a ni a, heimi bakah hian email hmangin mizoramlokayukta@gmail.com emaw mizoram.lokayukta@gov.in-ah complaint thehluh theih reng a ni.

Complaint-ah hian thubuai thehluttuin a hming leh biakpawh theihna chiang takin a ziak thin tur a ni a. A thehluttuin thup a duh a nih pawhin a hming leh nihna thupsak tur a ni.