Aizawl: Nimin khan Central Board of Secondary (CBSE) chuan an official website cbse.nic.in-ah Pawl 12 result a tichhuak a, Uttar Pradesh mi Meghna Srivastava chu India ram pumah pakhatna niin mark 500 ah mark 499 a hmu a ni. Aizawl-a CBSE Affiliate School, Mizoram Institute of Comprehensive Education (MICE) principal Lungngailova chuan Zalen zawhna chhangin an school pass percentage chu 79.12% a nih thu a sawi a. CBSE hnuaia pawl 12 exam hi mi nuai 11 chuangin an bei a, a pum puia pass percentage hi 83.01% niin a titha zual region te chu Trivandrum (97.32%), Chennai (93.87%) leh Delhi (89%) te an ni. CBSE hian March 3 - April 13, 2018 chhunga exam neih tura a ruahman chu zawhna put a awm avangin April 25, 2018-ah sawn a ni a, hemi ni hian zawhna puh rukna subject economics exam chu neih a ni. CBSE hian Pawl 12 result chhuak avanga zirlai naupangte a rilru harsatna awm thei chinfelsak turin ‘tele-counselling service’ a buatsaih bawk a. 1800 11 8004 number-ah hian zing dar 8 atanga zan dar 10 thleng counselling lama trained specialist te biakpawh theih reng an ni a. An zingah hian school hrang hranga principal te bakah India, Singapore, Nepal leh Gulf Countries dangte atanga psychologist thiam tak tak te an tel niin thu dawn a ni.&&&&