ZALEN July 30, 2026 : Council of Churches in Mizoram (CCM) hruaitute chuan FCRA Amendment Bill Parliament Monsoon Session-a ngaihtuah tura chhawm tum a nih avangin hemi duh lohna lantir nan August 11, 2026 hian Aizawl-ah kawngzawh huaihawt an tum.

Mizoram sawrkarin FCRA Amendment Bill-a hma a lak dan chungchangah CCM hruaitute chuan an duhkhawp loh tih an sawi a, sawrkar chuan tawrhna tur a neih ve lem loh avangin an ngaihven tawk lo pawh a ni thei a, anni erawh chu a tuartu an nih theih avangin a tawp thlengin he bill hi hman a nih lohna turin dodal an tum thu an sawi.

Kawngzawh an huaihawt tum hi an ruahmanna ang chuan hmun hnih atanga zawh tur a ni a, zing dar 10:30 atangin Zarkawt leh Sikulpuikawn atanga zawh tan tum a ni a, Vanapa Hall kawtah intawhkhawm a, hun hman an tum a, hemi atana hian CCM member chauh ni lo, Kohhran hrang leh NGO te pawh sawm an tum thu an sawi a, he bill duh lo zawng zawngte pawh zawm ve turin an ngen bawk.

CCM hruaitute chuan he dan hi a tlangpui en thuak chuan tha ve fu angin a ngaih theih a. Mahse, chik zawka han zir a, India rama hnam hnufual (minority) te chunga thil thleng tawh leh thleng mek nen en chuan a hmangtu tana hman sual theih thil a awm dawn nia a lan thu an sawi.

Ram dang atanga tanpuina lo kal FCRA hmanga lo dawnte hi sakhaw danga inlehtir nana hman (proselytization) phal loh a ni a, he dan kengkawhtuin hetianga hi an man emaw, an hmu emaw a nih chuan FCRA license cancel-saka an bungrua leh thil neih chhuhsak vek theih a ni a. Sakhaw danga inlehtir tih chhuanlama hmangin India ram hmun hrang hrangah Kristianten tihduhdan leh man an tawk tawh tih an sawi.

CCM hruaitute chuan, “Tuna FCRA Amendment bill hi hman a nih chuan license tihtawp chuah ni lo, foreign sum hmanga in emaw, ram emaw, bungrua emaw an lo neih tawh kha an chan vek thei dawn hi a pawi lai ber a ni,” an ti.

He dan tharin thuneitu thar awm tura a rel, Designated Authority a vuah chuan thu a nei hle dawn a, court phalna emaw, hriatpuina emaw tel lo pawhin Kohhran emaw, NGO emaw te bungrua leh hmunhma neihte chhuhsak a, tihral emaw, hralh theihna thuneihna a nei dawn tih sawiin, “Hei hi a him lo a, dan kalphung pangngai a ni a, chuvangin kan duh lo,” an ti.

CCM hruaitute chuan tunah hian Mizoram-ah FCRA license nei hi 19 an awm mek tih an sawi a, Presbyterian leh Baptist chauh kohhran hming anga nei an nih thu an sawi. India ram pumah FCRA license nei atangin Kristian pawl hi 12% chauh an nih laiin an fund dawn zat erawh 55-60% a nih thu an sawi bawk.