ZALEN Oct. 7, 2024; Tun dinhmuna kohhran 8 telna, Council of Churches in Mizoram (CCM) chu October ni 27, 2024-ah hawn a ni dawn.

Vawiin chawhnu dar 1:30 a Aizawl press club a thuthar thehdarhtute an kawmna ah he thu hi sawiin, CCM hruaitute chuan, tun October ni 26&27 ah Mission Veng Presbyterian Kohhran Biak In, Aizawl-ah CCM hawnna inkhawmpui neih a ni dawn tih an sawi a, October ni 27, 2024, Pathianni chawhma inkhawmah CCM hawnna Synod Moderator Rev. R Vanlalnghakan a nei dawn tih an sawi.

CCM hruaitute sawi danin, CCM Mizoram-ah hian full time a thawktu tur General Secretary leh thawktu dang ten office an luah dawn a, office hmunhma turte la neih chhoh tum a ni. October ni 28, 2024-ah CCM office hawnna neih tum a ni a, office lailawk tur hi Synod Conference Centre, Mission Veng, Aizawl-ah neih a ni ang.

CCM hmanga kohhran inpumkhatna chu Conciliar Unity anga kalpui tur a ni a, kohhran hrang hrangte kan chin dan inang leh lungrualna atanga thawhhona neih tum a ni. Thurin leh chin dan lama inan lohna te dah thain, kan rama mimal nun, khawtlang leh sawrkar thlenga kan inrelbawlna tihhmasawnna kawngah kohhran ten hma an lak theihna turin inpumkhatna hi kalpui tum a ni.

Tun dinhmuna kohhran 8 inziak lut bakah hian Mizoram chhunga kohhran pawl dang, CCM la zawm lo te pawh tel turin an sawm reng bawk.

Mizoram Kohhrante Inpumkhatna Joint Committee-ah hian charman chu Synod moderator Rev. R. Vanlalnghaka niin, Secretary-ah Rev. Dr. R. Lalbiakliana (BCM) a ni.

Tun dinhmuna CCM a tel tawhte :

1. Baptist Church of Mizoram (BCM)

2. Evangelical Church of Maraland (ECM)

3. Evangelical Free Church of India (EFCI)

4. Independent Church of India

5. Isua Krista Kohhran, Bualpui Ng

6. Lairam Isua Krista Baptist Kohhran (LIKBK)

7. Mizoram Prebyterian Church

8. Wesleyan Methodist Church of Mizoram