Aizawl September 8, 2024 : Chief Minister Lalduhoma chuan, "Sawrkar laipuiin Myanmar atanga raltlante chhinchhiah 'biometric identification' ti tura min tih angin raltlan chhinchhiah hna chu thawh mek a ni," a ti.

USA a zin mek Chief Minister Lalduhoma leh Indiana State a cheng Chin Community ten hun an hman honaah he thu hi sawiin Chief Minister chuan Myanmar raltlan chhinchhiah hna chu sawrkar hmasa atangin kalpui a ni tih sawiin inthlan a hnaih tak avangin tih chhunzawm a ni lo niin a sawi.

Sawrkarna an chan hnuah portal-a duhthlan tur awm chu an pawm thei lo tih sawrkar laipui hriattirin a hran siamsak turin an ngen a, portal thar an pek hnuah raltlan chhinchhiah hna chu an tawk ta tih sawiin, "Kan ti lo thei lo a ni," a ti. Chief Minister chuan raltlan zirlaite certificate-ah a hrana chhinchhiah tura sawrkar laipuiin a ngenna chu UGC in an ti anih loh chuan an tih dawn loh thu an hriattir niin a sawi bawk.

Chief Minister chuan Chin National Army, Chin Brotherhood leh ZRA te inkarah inremna awm se an duh tih a sawi a. Kaladan Multimodal Transit Transport Project chungchangah Arakan Army te nen an inbia tih a sawi bawk.