Aizawl August 15, 2024 : Central Kristian Thalai Pawl chuan KTP General Conference vawi 60-naah 'Ruihhlo do kawng hmalak' an rel angin Ruihhlo do awareness campaign a kalpui tan a, vawiin khan Aizawl district tan awareness campaign buatsaih a ni.

Ruihhlo do awareness campaign bul tanna hi vawiin khan Electric Veng Presbyterian Kohhran Hall-ah neih a ni a, Aizawl district chhunga Branch KTP te puala buatsaih a ni a, hun hnihah thenin, chawhma hun hi Ruihhlo Do Sub Committee Chairman F. Lalremruata'n a kaihruai a, Dr. Robert S. Halliday ruihhlo do kawngah zirtirna a pe a, chawhnu hun hi Central KTP Assistant Secretary C Lalkhawngaiha'n a kaihruai a, V Vanlalruati'n zirtirna a pe a, he hunah hian branch 200 chuang atangin aiawh pakhat theuh an tel a, campaign-a tel te hian an branch chhungah theuh ruihhlo do chungchang zirtirna hi an pe leh chhawng dawn a ni.

Central KTP buatsaih Ruihhlo do awareness campaign hi August ni 16 hian district hrang hrang khawpui ah neih chhunzawm leh a ni dawn a, he hunah hian Central KTP hruaitute'n ruihhlo do kawngah zirtirna an pe dawn a ni.

Kumin February ni 29 atanga March ni 3 chhung Ngopa-a KTP General Conference vawi 60-na neihah khan rorel inkhawmah ruihhlo do kawngah hmalak an rel a, hemi bawhzui hian ram pum huapin Ruihhlo do awareness campaign hi kalpui a ni dawn a ni.