October 30, 2023; Manipur Zohnahthlakte tawrhna chungchanga sawrkar laipui hmalakna an duhkhawp lo tih lantir a, central a BJP kaihhruai NDA sawrkar dodal zawng a Mizoram MP te'n hma an lak vang nia ngaih theih turin, Central BJP leh Mizoram BJP ten na takin MNF party an bei mek.

Kumin August thla khan Lok Sabha a BJP sawrkar rintawk lohna 'No Confidence Motion' put luh a ni a, hei hi Mizoram MP C. Lalrosanga chuan chief minister Zoramthanga thu angin a thlawp zawngin voice vote a pe a. Hei hi Manipur Zohnahthlakte tawrhna chungchang a sawrkar laipui hmalakna duhkhawp lohna vang niin, congress leh a tanrualpuite thlawp vang a ni lo.

Rajya Sabha lamah pawh MP K. Vanlalvena'n BJP kaihhruai NDA sawrkar rintawk lohna motion, eptu party te put luh chu a lo thlawp tawh bawk.

MP K. Vena hian Manipur Zohnahthlakte thlavang na takin a hauh bawk a, Home minister Amit Shah thusawi phei chu na tak a dodalna Rajya Sabha ah a au chhuahpui a ni.

Hetiang a MP te hmalakna nia ngaih ngaih theih tur hian, tunhnai a campaign a Mizoram rawn tlawhtu sawrkar laipui a BJP hruaitute chuan na takin MNF sawrkar an bei niin a lang a, SEDP chhui a nih tur thute an puan hial tawh bakah, an Manifesto ah meuh an tarlang a ni.