Aizawl; Nimin khan Tuipuiral Zirlai Pawl (TZP) chuan I & PR Auditorium ah freshers social an hmang a, Higher & Technical Education changtu Parliamentary Secretary H. Zothangliana'n khuallian niin a hmanpui. Khuallian chuan zirlai kalkhawmte chu central leh civil services hrang hrangah a tam thei ang luh tum turin a fuih. Parliamentary Secretary chuan, "Central Services-a lut kan mi hmasa te hian kan ram leh hnam tan nasa takin hna an lo thawk tawh a, chutiang mi ni tur chuan keini thangtharte pawh hian tan kan lak a ngai a. Hlawhtling tur chuan hlawhchhamna atanga inzir a ngai thin a ni," a ti bawk. H.Zothangliana chuan Mizo thalaite chu thianghlimna kawngah tun aia nasa zawka tan an lak a ngai nia a hriat thu sawiin, hlawhtling turin taimak a ngai a, taima tur chuan hrisel a ngai a, hrisel tur chuan thiang hlim a ngai leh a ni, a ti bawk. Tuipuiral Zirlai Pawl freshers social hi C.S.Zodinsanga leh Lalnunmawii ten kaihruaiin, zirlai ti tha leh Students Union tling tharte chawimawina hun hman a ni bawk.