Tun hnai khan Chief Minister Zoramthanga hova meeting chuan Delhi-a coaching kal tur te tan full sponsorship pek/siam an rel a. Meeting-ah hian tuna prelims leh mains a inziak tlingte tana cash incentive award siam leh coaching academy te nen tangkawp a crash course siam bakah hian thalai thahnemngai, tlin tum tak takte puihna turin Delhi a coaching academy tha tak takte nen thawkho a, a hmun a an zirna tur leh an zir chhunga an awmna tur te puihna tur full scholarship siam an rel a. Scholarship hmu tura exam buatsaih dan tur te, seat siam zat tur a ruahmanna pawimawh dangte chu siam thuai ni se an ti a ni.

Chief Minister-ho meuha meeting-in hetianga thutlukna an siam hi a lawmawm tak zet a, hei hi zirlaite tan chona a ni tih hriaa he remchanna hi thalaite pawhin an chhawr tangkai thiam a pawimawh dawn hle a ni. Tunhma deuh chuan tlangmi zingah Mizoram hi All India leh Central Services nei tam pawl kan ni thin a; mahse, tun hnaiah erawh chuan interview tura tling pawh kan awm ta meuh lo. Hriat theih chinah Mizote zinga IAS tling hnuhnung ber chu kum 2013 daih tawh kha a ni. Mizoram sawrkarin hetianga zirlaite tan thil lawmawm leh tha lutuk a chhawpchhuak hi zirlaiten chona ah ngai a, ti hlawhtlin hi an kutah awmin an mawhphurhna a ni tih an hriat a pawimawh.

Tun ang zela kan kal chuan nakin lawkah chuan kan sawrkar hotu lian zingah Mizo an awm tawh lo ang a, hnathawh leh thiltih kawng hrang hrangah harsatna leh buaina nasa tak kan tawk thei a ni. Tuna state thenawmte nen harsatna kan tawh mek ramri buai leh thil dangah te hian kan sawrkar hotulu Chief Secretary-ah te hian hnam dang awm ta se kan ram hi min hmangaih pui tak tak ang em? Thahnemngai tak hian Mizoram tan hian an thawk ang em tih hi zawhna awm thei a ni a. Chuvangin post pawimawh chelh tur hian ram leilung fate ngei an tha a, chutiang tur chuan kan inbuatsaih a tul tak zet a ni.

Mizote hi kan huaisen tawk lo nge ni kan ram hi a nuam lutuk zawk, state danga hna tha deuh thawh ai chuan Mizoram chhunga hna hniam deuh zawk thawh pawh kan duh zel ni mai hian a hriat a. Kan thenawm state-te chu hmun hrang hrangah hnathawkin an chhuak a, central a department pawimawh ah pawh a lian atanga a tê ber thlengin an inphum ther fuk mai bawk a, hei hian state-ten sawrkar laipui an dawrna kawngah leh file kal velah nasa takin a pui bawk a. Chuvangin, central secretariat lamah pawh a tam thei ang ber thawk tura kan inbuatsaih a tul ta tak zet a ni.

Mi tam takin central service te hi Mizo thluakin a phak lo, a har lutuk niten an sawi thin a. Hei hi a dik lovin chhuanlam mai mai a ni. Mizote hi hnam dangte nen thil kan tih hona reng rengah a thiam ber pawl kan ni thei zel, kan phak lohna thin chu kan taima tawk lo fo hi a ni. Hnam dangte chuan tih tak zetin an zir thin a, keini erawh malsawm tlakin an zir tawk lo fo a, hei hian min hlawhchham tir fo zawk a ni. All India leh Central Service ah hian Mizote hi kan inziak tling thei a ni tih kan hriat nawn leh a tul a, a pawimawh ber chu tumruhna hi a ni.