Mizote hian central service hrang hrangah post klan chelh tlem ta hle mai a. Mi thahnemngai te chuan he thil hi veiin sawi pawh an sawi tam hle. Mahse sawi leh infuih ringawt chuan awmzia a nei tawk lo niin a lang a, kumtina Union Public Service Commission leh Staff Selection Commssion hnalak zingah pawh Mizo hming hmuh tur a vang chho zel a. Kan unau state danga mi te hming a lang leh zauh thin a, hei hian min la chawimawiin kan la 'Nil' loh phah niin a lang.

Tun ang zela kan kal chuan nakin lawkah chuan sawrkar hna pawimawh leh a lu ber ber te hi hnamdang an la ni ngei dawn a, chutih hunah chuan thutlukna pawimawh bakah ram leh hnam himna chung-changah pawh hma-lak a har tawh dawn a. Nikum lawka Bru chungchanga kan buaina leh kan IAS senior officer pakhat Election Commission in a sawnna ah pawh khan Mizoram sawrkar hnathawk zinga a hotu lu ber chu hnamdang a ni a, mi tam tak chuan a inrawlh ngei an ring tlat a ni. Hetiang deuh hian IAS leh central service dang kan neih loh chuan nakin zelah harsatna kan tawk zel ang tih a hlauhawm hle.

Mizo thalai te central service ah mai ni lo hna hrang hrang kan thawh theihnan Mizoram Youth Commssion chuan hma a la thin a. Chairman kal chhuak ta hmalakna in central service a inziak tling te chu sum fai hmangin tanpuina pek  tura tih a ni a, hei hian thalaite a cho phur a, mi tam tak a ti thangharh a ni. Central service mai bakah sipai leh hna dang dangah te pawh mi tam tak thun an ni a, an hmalakna hi chhunzawm zel theih nise a tha khawp ang.

Mizoram sawrkarin Mizoram Youth Commission (MYC) Chairman atana a ruat thar Dr. Vanlaltanpuia chuan tunhnaia pisa thar a luahna ah Mizo thalaite chu Sports, Music, Academic, Entrepreneurship, Nursing, Hospitality leh thiamna dang tam tak an neihte chu hnaah leh pawisa-a chantir a, ram economy sanna tur atana hmalak pui a pawimawh thu a sawi a. IAS engemawzat chherchhuak tur leh India rama Institution tha tak taka Mizo thalai tam zawk an luh theihna tur atana MYC hmalakna chu nasa taka tih chak anih tur thu a sawi bawk a ni. MYC chairman thar hmathlir hi a ropui a, tih hlawhtlin ngei ni se a duhawm hle.

Mizote hi zirna lamah kan hniam bik lo a, hnamdang tih theih chu kan ti thei ve vek a ni. Tuna kan harsatna ber chu rualelna leh thahnemngaihna kan nei tawk lo hi a ni. Kaihruaitu tha kan neih a, cho phurtu kan neih bawk chuan Mizote hi kan hniam bik lo a ni tih kan hriat a pawimawh. Central service leh hna hrang hranga Mizote kan luh tam zawk theih nan Mizoram Youth Commission hi hnathawk thei tura tih chak lehzual nise, a hlawkna chu Mizoram hian a hmuh ngei a beiseiawm e.