ZALEN November 21, 2024 : Govt. Gandhi Memorial High School Champhai, kum 75 tlin lawmna chu vawiin khan hman a ni a, he hun hmanpuitu Home Minister K Sapdanga chuan Central Service-a in ziaktling tura tan la turin zirlaite a fuih a, GM High School Headmaster pension tawh R Khawbula (L) leh Rohmingthanga (L) te hriatrengna chawlhbuk a hawng bawk.

K Sapdanga chuan, "Champhai Zote khua atangin Kum 50 kal ta 1971-ah GM High School ah hian ka lo lut ve tawh thin a, 1974 ah pawl 10 kan zir chhuak a, chuhtihlaia kan Headmaster chu Pu Thanseia kha a ni. Kan rawlthar hun pawimawh tak, nungchang hloh hun lai tak maiin he lai hmunah hian hun ka hmanga, zirtirtu tha tak mai leh zirna tha tak, thian ṭha tak tak ka chhar a. Ka nuna thil hlu tak mai he school atanga ka chhar chu, Evangilical Fellowship an lo siam te khan tun thlengin ka nun a la kaihruaia ka lawm hle a ni."

"He sikul atang hian mi chhuanawm tak tak leh mi hmasa - IAS, IPS, Engineer leh a dangte an lo chhuak tawh thin a ni. GM High School chhuak te chu Mizoram pum titi leh hriat hlawh an ni thin, vawiina zirlai kalkhawmte chu mi hmasate sulhnu chhui a, ram pum tana mi chhenfakawm nih tum turin ka chah che u a ni," a ti.

DP&AR Minister K. Sapdanga chuan, "Mizoramin All India leh Central Service Regular Recruit/ Direct Recruit kan nei tlem tial tial a, kan neih chhun te pawh kan chang vek thei lo tih a sawi a. Mizoram District hrang hrangah Mizo ngei DC leh SP dah duh ṭhin mah ila, kan indaih miau loh avangin hnamdang dah a ṭul a ni tiin zirlaite chu he lam kawnga an ngaihtuahna te seng turin a fuih bawk a ni," a ti bawk.

K. Sapdanga chuan hlawhtling tur chuan mi hlawhtlingte zir anga zir mai hi a kawng awlsam tak a nih thu a sawi a. Tun aṭanga kum 19-ah chuan GM High School a lo zir tawh te hi Mizoram puma a thiam ber ber ni thei se a duh thu sawiin, zirlaite chu tun aṭanga tan la a, zirna kawngah theihtawp chhuah turin a chah a ni.

Home Minister hian Champhai Zote ITI building-a Myanmar atanga raltlan awm mek te a tlawh a, sawrkar-in he building hi zirna lam atan chei bawl a duh tawh avangin, Champhai Zion vengah YMA Sub-Headquarter Champhai ten relief camp tur an buatsaih mek a, he hmun hi tlawh nghalin Home Minister chuan an mamawhte tihhlawhtlinsak a inhuam thu a hrilh. UD&PA Minister hian Champhai Ruantlanga Truck Terminal leh Solid Waste Management a tlawh bawk.