October 10, 2023; Nimin ni 9.10.2023 (Thawhtanni) chhun khan Central YMA hruaitute chuan Virendra Jhakhar, Executive Director, NHIDCL chu a office Tuikhuahtlangah an kawm.

Mizoram chhung hmun hrang hrang inkalpawhna kawngpui lian NHIDCL enkawlna hnuaia siam mek chungchang an sawipui a. Kawng tha zawk kan neih theih nana kawngpui siam thar leh a awmsa tih zauh mekte chu furpui avanga harsatna an tawh chu an hriatthiam pui rualin, ram mipuiten kan tuarta lutuk leh mangan thlak khawpa kawng chhia a awm ta chu hriatthiam harsa an tih thute NHIDCL Exe. Director hnenah hian an thlen a ni.

NHIDCL Executive Director, Virendra Jhakhar chuan Central YMA hruaitute thu thlen hrang hrang chu chhângin, chak zawka hma an lak nghal tur thu a sawi a. A hnuai mi ang hian hun bi tiam siamin an hmalakdan tur a lo hrilh a ni.

1. Sairang leh Vairengte inkar kawng chhe zualpui hi, ruah a sur loh chuan, ni 14 October, 2023 ral hmain pangngai taka motor tlan theih turin an siam ngei tur thu a sawi a.

2. Lunglei leh Tlabung inkar kawng pawh, ruah a sur loh chhunzawm chuan, ni 13 October, 2023 ral hmain pangngai taka motor tlan theih turin an siam tur thu a sawi bawk a ni.

3. Saitual to Tuivai (Manipur road) pawh, chak taka an thawm ṭhat mek thu sawiin, ruah a sur loh chhumzawn chuan, hun rei lo te chhungin motor chi tin tlan theihna turin an thawm ṭhat thuai tur thu a sawi bawk.

4. YMA Inkhawmpui Lian, ni 24-26 October, 2023 chhunga Biate khuaa neih turah, Mizoram hmun hrang hrang aṭanga Biate panna kawng, NHIDCL hnuaia awmte chu; ni 20 October, 2023 ral hmain motor chi tin tlan theih turin an lo siam vek ang a. A ṭul dan a zirin, Sub-Headquarters/Group/Branch YMA hruaituten an huam chhung kawngte chu, ni 20 October, 2023-ah an endik ang. Ṭha tawk lo leh motor chi tin tana tlan harsa lai deuhte chu, ni 24 October, 2023 hmain an siam ṭha leh vek ang tiin, Executive Director hian thu a tiam bawk a ni.

Jhakhar chuan, Central YMA hruaitute hnenah hian an harsatna tawh hrang hrangte a lo hrilh a. Ruah sur reng mai chuan, an hnathawh a tihkhaihlak nasat thu leh, harsatna a siam nasat zual thu a sawi bawk a ni. Khuain zah a ngaih chhunzawm zel chuan, an hnathawh pawhin hma a sawn chak theih tawh tur thu a sawi bawk a ni.

Central YMA hruaitute pawhin Jhakhar-a chu, an Contractor-te tun aia chak zawka hna thawk tura nawr turin an hrilh a. Amah ngeiin hna thawhna hmunte a tam thei ang ber tlawh ṭhin tur leh; harsatna awmte pawh ama hova chingfel vat ṭhin turin an hrilh a. A ṭul phawt chuan, hmun hrang hranga YMA Sub-Headquarters, Group leh Branch hruaitute pawh, an harsatna sutkuanpui tura sawm ṭhin turin an chah bawk a ni.