ZALEN March 4, 2026: Central YMA Hall, Tuikhuahtlangah vawiin khan ruihhlo do chungchanga inrawnkhawmna hun hman a ni a, R. Lalngheta, President in a kaihruai. 

He hunah hian Central YMA hruaitu (Office Bearer) lo ni tawh thenkhat, Central YMA hnuaia ruihhlo do pawl SRS leh CADS member lo ni tawh te leh CEC ni lai leh CYMA OB te an tel a. Prof. Malsawmliana, General Secretary in ruihhlo do kawnga Central YMA hmalakna tlangpui a sawi. 

Inrawnkhawmnaah hian ghruaitu hlui ten thu sawiin, Central YMA hma lak mekna tha an tih thu leh theihtawp chhuaha hma lak mekna tha an tih thu an sawi a. Tha thlah lo leh beidawng mai loa thawk zel tur leh fimkhur taka ruihhlo do zel turin an duh thu an sawi. Tawngtai tam a pawimawh thu an sawi bakah dikna leh rinawmna vawng reng turin YMA member kal khawm te an chah. 

SRS leh CADS a lo tel tawh, ruihhlo doa tha leh zung lo seng tawh te pawhin thu sawiin, ruihhlo ngaite hi Pathian an hmuh theihna tura hmangaihna thinlung pu chunga thawk turin tuna ruihhlo do mek tute an chah bawk.

Kal khawmte chuan YMA in ruihhlo do kumpuana a hmang mek hi an thlawp tlat thu an sawi.

He hunah hian hruaitu hlui zingah Vanlalzawma, T. Sangkunga, Vanlalrema Rokhum, RL Rindika, Chalkhuma, Lalzuiliana, Vanlalruata leh Fabian Lalfakawma te an tel.

Pic - File photo