ZALEN Dec. 30. 2024; Vawiin (30.12.2024) chawhnu khan Central YMA in Aizawl Bazaar leh a chheh velah halpuah leh halmawi zuar an awm leh awm loh enfiah hnatlang an nei.

Central YMA Office Bearer te kaihhruaina in Group 5 ah inthenin Chanmari atanga Sipai Lammual Hmar lam Gate inkar, Bazaar leh a chhehvel fang kualin halpuah leh halmawi zuar an awm leh awmloh an enfiah a. Dawrkaite chu sawrkar phalloh thil halmawi chi hrang hrang zuarlo turin an ngen kual nghal bawk.

Vawiina Aizawl bazaar leh a chhehvel an fan kualnaah hian Central YMA Ob te leh CEC memberte bakah YMA Branch hrang hrang - Dawrpui, Zarkawt, Chanmari, Electric Veng, Chhinga Veng leh Saron Veng Branch hruaitute an tel a. Aizawl Police Station atangin Police lamin Duty insiamin an puibawm bawk. 

Hetianga enfiah hnatlang hi Krismas hma, ni 21.12.2024 (Inrinni) khan an lo nei tawh bawk a ni.

Central YMA hian vawiin khan Aizawl khawpui chhung hmun hrang hrangah Motor atangin halpuah leh halmawi that loh zia mike in an puang bawk.

Central YMA chuan naktip maia Kumthar lo thleng tur hlim taka kan hman theihnan mipuite duhsakna a hlan a, Sawrkar phalloh thil halpuah leh halmawi te hal lo tur leh zuar lo turin mitinte a ngen a. Branch YMA hrang hrangte pawh mahni huamchhung theuhvah theihtawpa tan la turin a ngen nawn leh a ni.