ZALEN, 29th May 2024 : Nimin (28.5.2024)-zinga Melthum leh Hlimen lei tawlhin In a hnawl avanga nunna chan ruang la hmuh loh mi 5 te chu zawn hna kal pui mek a ni.

Vawin chhun dar 12 vel khan Melthum-ah Gloria MS Dawngliani (14) ruang chu lak chhuah a ni.

Melthumah hian Mizo pali ruang hmuh a la ni loa, Hlimenah hnamdang pakhat lak chhuah a la ni lo thung.

Melthum leh Hlimen ah hian ruang 25 hmuh tawh a ni. Ruang la hmuh loh te hi naktuk (30.05.2024) ah zawn chhunzawm leh tur a ni a, hetiang hian Central YMA te chuan hnatlang turin Branch YMA ten an ruat a ni.

Melthum-a hnatlang turte : 1. Tuikual South 2. Tuikual North 3. Vaivakawn 4. Venghlui 5. College Veng 6. Dawrpui Vengthar 7. Bungkawn Vengthar 8. Dawrpui 9. Zarkawt 10. Upper Republic

Hlimen-a hnatlang turte : 1. Mission Veng YMA 2. Khatla 3. Khatla South 4. Nursery Veng 5. Bungkawn

Central YMA te chuan hnatlanga thawk chhuak turte chu zing dar 9:00 lei tawlhna hmun thleng turin an ngen a ni.

Aibawk-ah leiminin a hnawl Matthew Lalchhanhima leh a nupui Vanlalruali Aibawk, kum 34 ve vete ruang chu hmuh zawh a la ni lo a, naktuk hian hnatlang a zawnhna la thawh chhunzawm tur a ni bawk ang.