December 12, 2022; Vawiin chawhnu dar 3 khan Central YMA hruaitute chuan Chief minister Zoramthanga chu a office ah hmuin, 'Neih inang inkawp' etc. ((Lesbian Gay Bi Sexual Transgender queer Intersex/LGBTQI) te tana shelter sa tura hmalakna kal mek chu an duh loh thu leh tihlawhtling lo tura an duh thu an thlen.

Central YMA president R. Lalngheta hnen atanga ZALEN thudawn  danin, CM hnenah Central YMA chuan 'Neih inang inkawp' chu Mizoram in kan pawm loh thu leh anmahni pual a shelter sak tumna awm mek chu titawp turin thlen a, CM chuan a changtu UD&PA minister, Deputy CM ni bawk a lo sawipui nghal tur thu a lo hrilh a, hemi chungchangah hian meeting pawh neih a ni dawn nia hriat a ni.

Myanmar kuhva ro tawlh chungchang a hmalakna chak zawka kalpui a nih theih nana tan lak a tul thu thlen bawkin, Central YMA chuan Mizo leh Mizo kan inhmel mak mai dawn nia alan thu an thlen bawk a, Central YMA rawtna angin, tun December ni 15, Ningani hian kuhva ro tawlh chungchang ah a changtu minister leh a kaihhnawih department te nen meeting neih nise tiin ruahmanna an siam nghal bawk.

Hengte bakah hian, Bangladesh atanga Mizo raltlante chung chang an sawipui bawk a, chenna hmun ruahman dan ngaihtuah sak an duh thu an thlen bawk a ni.

LGBQTI shelter hi Sakawrtuichhun, Aizawl ah Rs. 35,00,000 seng a sak turin UD&PA department chuan hmalakna a kalpui mek nia hriat a ni a, hnathawktu tur thlang turin tender pawh December ni 6, 2022 khan tihchhuah a ni a, ruahman danah chuan shelter hi thla 6 chhunga sak zawh tur a ni.