ZALEN November 17, 2025: Vawiin tlai khan Central YMA Office ah Central YMA OB te leh Aizawl City Local Council hruaitute an inkawm a. ILP chungchang te, dan lova hnamdang sumdawng tam ta lutuk te, Aizawl khawpui chhung kawng siam mek en zui chungchang te, ruihhlo do chungchangte an sawiho. 

Inkawmhona R. Lalngheta, President, Central YMA chuan a kaihruai a, Inkawmhonaah hian Ruihhlo do chungchangah YMA leh Local Council te tanho a tul zia te, YMA leh LC ten hriatpuina lehkha leh NoC pek chhuah chungchangah fimkhur taka kal pui a tul thu te sawiho a ni. 

Aizawl City Local Council (ACLC) President C. Lalbiaknunga chuan, YMA in ruihhlo do kawnga khawtlang tana tha tura an ngaih chu Local Council in lo dodal loh pawh a tha ang tiin a sawi. 

Central YMA President R. Lalngheta, President pawhin ruihhlo do kawngah chak takin hma lak a tum a, LC te tawiawmna an mamawh dawn thu a sawi.

Inkawmhonaah hian ACLC atangin President C. Lalbiaknunga leh hruaitu dang 4 te an tel a; Central YMA atangin President R. Lalngheta leh hruaitu dang 4 an tel.