ZALEN August 11, 2026: Mizoram Tourism Department leh Central YMA te chuan vawiin khan Tourism Minister Lalnghinglova Hmar, pisa-ah thawhhona thuthlung (Memorandum of Understanding) an ziak. Tourism Commissioner Vanlaldina Fanai chuan Tourism Department aiawhin hming a ziak a. Central YMA aiawhin President R Lalngheta’n hming a ziak a ni.

Tourism Minister Lalnghinglova Hmar chuan Tourism chungchangah Central YMA leh Tourism Department ten thawhhona thuthlung an ziak thei chu lawmawm a ti takzet tih a sawi a. “Tun hnaiah kan state-ah tourist an lo lut nasa a, heti lama kan hmalaknate leh kan hmachhawp awmte pawh a thahnem tham hle. Infrastructure leh thil dangah hmalakna hrang hrang awm mah se, a tak taka kan buaipui tur chu mihring an ni a, khualzin an tam zel avangin department chauhin a dawl zawh rual a ni lova, YMA te nen kan tanrual hi a ngai a ni," a ti.

"Tourism Department hi tunah department lian lo tak ni mah se, potential tha tak kan nei a. Tun atanga kum rei lo teah chuan department lian, sum thawhchhuah lamah pawh a lian zingah a tel thei ngei ang," tiin a sawi bawk.

Tourism Department Commissioner & Secretary Vanlaldina Fanai chuan Central YMA nen thawhhona thuthlung an ziak thei tur chu lawmawm a tih thu sawiin, Tourism lama hmasawn tumnaah Central YMA neitu chan chang taka che turin a sawm a. Central YMA President R Lalngheta pawhin theihtawp an chhuah tur thu a sawi a, YMA leh Tourism Department thawhona chuan rah tha a chhuah ngei a beisei thu a sawi a ni.