October 26, 2023; Biate khuaa nghah YMA khawmpui lian vawi 74-na hman mekah vawiin hian hruaitu thar thlan a ni a, president thar atan Lalhmachhuana, Chaltlang Lily Veng thlan a ni.

President thlan ah hian vote 2,651-ah 1,330 hmuin a tling a, Lalhmachhuana hi vice president ni lai niin, R. Lalngheta a thlak ang.

He thu ziahlai hian OB dang thlan mek zel a ni.

Nimin khan Central YMA President R. Lalngheta kaihhruaiin rorela inkhawm a ni a, palai 1579 in ro relin, kumpuan thupui atan ‘Ram leh hnam humhalh’ tih an thlang nawn.

Zialung Run Biateah rorel a ni a, rorel inkhawmah hian thupui atan “Ram leh hnam humhalh” tih leh “Ruihhlo do” tih lutin sawi ho a nih hnuah ‘Ram leh hnam humhalh’ tih chu rorel palaiten an thlang a ni.

Rorel palaite hian chhiatni thatni dan ennawn rawtna lut chu an pawm a, heng bakah hian Sorkar khawih agenda ‘Quality Education a awm theih nan sorkarin tun ai a chak zawkin hma la rawh se’ tih chu pawm a ni a. Armed Battalion pakhat tal sorkarin din belh rawh se, tih erawh pawm a nilo.

Nimin rorel inkhawma agenda pawm takte chu, environment humhalhna kawngah Central YMA in tun ai a chak zawkin hma la rawh se tih te, Hmun hrang hranga awm Zofate inpumkhat lehzual theih nan tun aia chak zawkin Central YMA in hma la rawh se, tihte. Social Audit chu tha zawka kalpui a nih theih nan leh mipuiin an hlawkpui theih nan hmalak ni rawh se tih te, YMA-ten sorkar dedartment a thawhpuite zirchian a, thawhpui awm chauh thawhpui tawh nise tihte, Environment clearance tel lo chuan Mizoram chhungah hmasawnna hnathawh a nih tawh loh nan Central YMA-in hma la rawh se tih leh tui hna humhalh kawngah YMA-in uar zawk leh nasa zawkin hma la rawh se, tihte a ni.