Aizawl: Nikum 2015 chhung khan Mizoram pumah mitthi 6518 an awm niin Economics & Statistics Department chuan an chhinchhiah. Economics & Statistics Department in mitthi 6518 an chhinchhiah zingah hian mi 2779 te thihchhan an chhuina ah HIV, Septicemia, TB, Malaria inkawp 'Certain Infectious and Parasitic Disease' chu thihna thlentu tam ber niin mi 444 an thi a, hei hi mitthi atanga chhutin 15.9% a tling a ni. Thin leh kawchhung lam kaihhnawih chi hrang hrang vanga thi 439 (15.7%) chuan a dawt leh a ni. Chhinchhiahna atanga a lan danin Cancer kaihhnawih vanga thi hi 340 awmin hei hi natna mala thihna thlentu lian tak a ni. Economics & Statistics Department ina mitthi an chhinchhiah 2779 zinga 1871 chu mipa niin 908 chu hmeichhia an ni a, thi zinga a tam ber 832 chu thalai kum 35-54 inkar an niin hei hi thi zawng zawng atanga chhutin 30% an tling pha hial a ni. Department thawktute chuan mitthi te thihchhan an chhinchhian mi 2779 te hi damdawiin a thi leh Doctor ten an thihchhan an hriatchian te chauh an ni tih Zalen an hrilh a. Accident vang te, inlama thi leh enkawl mumal hmanlohte chu Medical Certification of Causes of Death 2015 ah hian tarlan an ni ve lo nia sawiin tun tuma thihchhan tarlan hian Mizoram hmel a tilang tho nia an hriat thu an sawi. Department thawktute chuan Mizoram khaw tinah Registrar of Births & Deaths an neihloh avangin nikum mitthi zat hi chhinchhiah aiin a tam theih thu an sawi bawk. Cancer a thi an tam chhan ber chu zuk leh hmuam tih nasat vang nia a hriat thu helam chhuitu Doctor pakhat chuan Zalen a hrilh a. Hei bakah exercise lak thatloh vang te, zu in nasat vang leh thau/mawm ei nasat vang te in Mizoram ah Cancer a hluar nia a hriat thu a sawi bawk.