Aizawl: Chief  Electoral Officer hekna avangin Mizoram sawrkara Principal Secretary (Home) hna thawk mek Lalnunmawia Chuaungo chu Election Commission of India chuan a hna chelh lai chawlhsan tur leh Mizoram inthlan zawh (December ni 13, 2018) hma chu Ministry of Home Affairs-ah awm hrih turin a ti. Central YMA Executive Committee Emergency Meeting nimina neih chuan Mizoram MLA inthlanna lo awm turah, inthlanna felfai leh muanawm a awm theih nana daltu nia lang, S.B. Shashank chu ni 5.11.2018 tlai ni tlak hma ngeia Mizoram chhuahsan tura NGO Co-Ordination ten an lo rel chu tha a ti a, a hlawhtlin theih nan hnam chhan hnatlang nei thei turin Mizo mipuite leh YMA member zawng zawngte lo inring lawk turin an beisei bawk. Hetih lai hian ECI remtih loh vangin SB Shashank hian Mizoram chhuahsan a tum lo nia thudawn a ni bawk. Zalen thudawn danin CEO hna chelh mek SB Shashank hian Election Commission of India hnenah Principal Secretary Home Lalnunmawia Chuaungo chu Bru te Electoral roll a thun chungchangah harsatna siamtu leh inthlan kaihhnawiha para military force duty tur dil chungchangah harsatna a siam niin a thlen a. Bru-te roll-a thun chungchangah hian CEO hian Bru identification siam chu roll a thun nan hian hman a duh laiin Home Department lam chuan Mizoram mi leh sa an nih finfiah nan chauh hman nise a ti a. State dang atanga para military force rawih chungchangah pawh CEO hian Home department te rawn lovin company 40-pe turin a dil a; mahse, Home department lam hian Mizoram chu state ralmuang anih avangin company 20 a tawk an ti a, para military force te ei leh in bakah senso dang hi a hautak em avangin 40 hi a ngai lo niin an sawi bawk. He thil thleng chungchangah hian Zalen palai tiamin Press mi engemaw zatin CEO SB Shashank hi hmuh an tum a, mahse chhuanlam siamin tumah a hmu duh lo a. Telephone hmanga Election Commission of India-a a lehkha thlen pe ve tura an dilna chu a pek theih loh thu sawiin India Express chanchinbuin an neih theih dan chu a hriat loh thu a sawi. Zalen thudawn danin Mizoram CEO-in ECI hnena a thu thlen hi a thawhpui Election department pawhin an hriatpui lo niin an sawi. Lalnuunmawia Chuaungo sawn a nih chungchangah hian thuk takin politics a inrawlh thei niin Zalen chuan thu a dawng a. “Mizoram Electoral Roll a Bru thun chungchanga harsatna a awm avangin sawrkar laipui chuan harsatna siamtu hi dahbo an duh a ni thei a. Hei mai bakah tuna bureaucrat lian tak hna chelh mek dinhmun sawhngheh nan remruatna a awm a ni thei a. Chumi hriatpuina tel lo chuan CEO hian thil a tih ngam a rinawm loh,” tiin thil chikmi tak pakhat chuan Zalen a hrilh bawk.