ZALEN January 30, 2026: Mera Yuva Bharat, Ministry of Youth Affairs & Sports bultumin vawiin khan Govt. T. Romana College-ah ‘National Voters Day Padyatra’ hawihawt a ni . Programme thupui chu 'My Bharat My Vote' tih a ni a, India ram thalaite ram rorelna kawnga an mawhphurhna leh democracy kal zel vawn nun zel nan he Programme leh kawngzawh hi neih a ni. Chief Electoral Officer Dr. Lalrozama, IAS chu khuallian a ni.

Dr. Lalrozama chuan India ram chu khawvela 'Democracy’ ram ropui ber tia chhal ngam a nih thu sawiin ‘Democracy innghahna chu Inthlan (Vote) hi a ni, a ti. Ram hruaitu thlan chhuahna kawngah mipuite’n chanvo pawimawh tak an neih hi an hlenchhuah a pawimawh thu a sawi. ‘National Voters Day Padyatra’ hmannaa Voters tharte leh thalai kalkhawmte chu anmahni duhthlanna hmanga ram hruaitu thlang thei an nih thu sawi. Vote thlak chu chanvo pawimawh tak leh mawhphurhna lian tak a nih thu leh rilru fim tak pu a an duhthlanna hmanga ram hruaitu thlang turin a fuih a ni.  

Vawiina ‘National Voters Day Padyatra’ hmanna ah hian ‘My Bharat My Vote - Celebrating Young Voters of Viksit Bharat’ tih thupui au hlaa hmangin Govt. T. Romana College zirlaite leh zirtirtute leh Youth Club memberten kawng an zawh a, Prof. Malsawmliana, General Secretary CYMA chuan he kawngzawh hi a vailiam (Rally Flag Off) a ni.

‘National Voters Day Padyatra’ kawngzawh neih zawhah hian Govt. T. Romana College tualzawlah hun hman niin Dr. Jenifer Lalbiakdiki, Principal, Govt. T. Romana College chuan  kalkhawmte lawmna hun a hmang. He hunah hian Inthlanna thianghlim nei tura thutiam (Pledge) sawirualna hun hman a nih bakah kum 18 tling Vote nei tharte lawmna hun neih a ni bawk. Mera Yuva Bharat, Mizoram State Director Mercy Selate chuan he hunah hian kalkhawmte hmaah thalaiten mahni hriselna ngai pawimawh turin a chah a, kan ram neitute kan ni a, kan ram tan thahnemngaiin kan hmangaih tur ani tih leh MY Bharat Portal ah in register turin a sawm a ni.