Aizawl; Naktip Thawhlehni hian AMC sawrkar ZNP, MNF leh MPC intawm chu buk anih hmel a, hetih lai hian sawrkar tharah Congress-in Chairman leh Executive Councillor 2 changin MPC lamin Vice Chairman leh Executive Councillor 1 an chang dawn nia thudawn a ni. Zalen palaiin a biaknaah AMC Chairman Zarzoliana chuan AMC kal dan chu zahthlak a tih thu leh Aizawl mipuite lakah ngaihdam a dil tih a sawi a. "Aizawl khawpui enkawl tura thlanchhuah hmasak ber ten rohlu siam lam aia lalna leh thuneihna ringawt kan inchuh ta mai hi zahthlak ka ti a. Sawrkar thar lo ding tur hi chuan a term hmangtluan ngei se ka duh a ni," a ti. AMC Chairman chuan MPC lamin hna sem chungchangah thleibik leh duhsak bik nei anga an puhna chu chhuanlam ve mai maiah a ngai tih a sawi a, "Kan hnena an sawi chu kan tihsak zel a ni," a ti bawk. MPC Vice President Vanlalhlana chuan AMC sawrkar atanga an inhnuhdawh chhan chu thlauhthlak an tum vang tih a sawi a. "Kan Councillor te bânah an vau a, kan tel loa sawrkar siam tumin hma an la a, mualpho taka thlauhthlak ai chuan tiin hetiang hian hma kan la ta mai a ni," tiin Zalen palaiin a biaknaah a sawi. AMC Vice Chairman Lalrinenga Sailo pawhin AMC kaldan chu Aizawl khawpui hmangaihtu tan chuan lainatawm a tih thu leh tun hnuah chuan thleng tawh lo se a duh thu Zalen-in a biaknaah a sawi a. MPC lamin thlauhthlak an tum nia an puh chungchangah, "MPC hi thlauhthlak kan tum lo a, sawrkar nghet lehzual a din theih nan tun hnaia ZNP atanga chhuakte chu sawrkara tel turin kan sawm a, mahse an dawnsawn dan a dik lo mai a ni," a ti. MPC te thiltih dan chu a hma atang tawha tum lawk nia a hriat thu sawiin, "Nau huai bak, thlem hleih theih loh ang an ni," a ti bawk. Hna sem chungchangah pawh MPC bial chu midang bial aiin hna a tam zawk niin a sawi bawk. Congress Thalai General Secretary Dr. Lalmalsawma chuan AMC buk anih zawhah sawrkar thar siam turin hma an la nghal dawn tih a sawi a. AMC Chairman ah CT Zakhuma dah leh an tum tih sawiin a thawhpui tur chu ruat fel thuai an ni dawn tih a sawi a. Vice Chairman leh Executive Councillor, MPC thehchhuah an tum leh tum loh zawhna chhangin "Kan pe mai ang chu!!" a ti bawk. AMC sawrkar inthlak chungchangah chhim lama awm chanchinbumi pakhat chuan, "Hmanah khan District Council nep zia, luang thli chhem nghin ang mai leh principle an neih lohzia tiin hmusit takin in sawi thin a. AMC pawh eng teh ruai a lo ni bik lo a nih hi," tiin a sawi.