Season kal mekah coach pahnih an bân tawh a, an chhawr leh mek pawhin vawi li khelhah a la chakpui lo a ni mai lo, hnehtawk pawh a la neihpui lo. Heng inkhelah hian goal sarih chhuahin goal khat chiah an la thun bawk.

Hei hi Chelsea dinhmun mek a ni.

Frank Lampard-a team hi Thawhlehni zanah Uefa Champions League quarterfinals-ah Real Madrid-in hnehin tun season chu nomawi la lovin an tluan dawn tih a chiang ta a; chu mai a ni lo, Premier League-a an dinhmun mek enin season tharah Europe inelnaah an inlan phak a rinawm loh va, kum 25 chhunga an inlan phak loh vawi hnihna chauh a ni ang.

May, 2022-ah American investor Todd Boehly leh private equity firm Clearlake Capital-in an lei a, nipui leh thlasik bazar tum khat ve ve an paltlang tawhah player 30 lei nan £ maktaduai 550 zet an seng tawh a, an dinhmun erawh khiti chauh khi a la nih si avangin an legend-te ka atang pawhin bazar nghek nghek ringawt selna tawngkama ngaih theih a ri chhuak ta hial.

Blues tana goal 104 zet lo thun tawh, Didier Drogba chuan an hun lai nen tuna Chelsea chu a inang lo tak zet tawh tih a sawi a, "Player it zawng chu an tam alawm; mahse, duhthlanna kha a fing thin," tiin player lei chungchang a sawi.

A hun laia a luhpui - Petr Cech, Andriy Shevchenko, Hernan Crespo, Michael Essien leh Florent Malouda te hming lam chhuakin, "Nomawi kha kan la a, tawnhriat kan lo nei sa nual bawk. Tunah chuan kalphung a dang ta a, player naupang zel lak luh an ni," a ti.

"Mi dang tiphur thei leh hruaitu an tlachham a, mawhphurhna la ngam an mamawh," a ti bawk.

Midfielder hlui, Chelsea tana vawi 105 lai inlan tawh, Greece enkawl mektu, Gus Poyet pawhin, "Roman Abramovich (neitu hmasa) hnuaiah kha chuan player lo lut 90% kha chu mamawhna ang taka hman nghal theih an ni a, chutiang mi ni lo chu chhuah leh a ni mai," tiin, tuna player lei vak vak kalphung sawisel chiah si lovin, an bazar thin dan a sawi.

"Tunah erawh chuan January-a lut thar zingah pawh Enzo Fernandez leh Joao Felix tih loh chu 'nakin atan' tih vek an ni," a ti.

"Engnge nakin chu, nakum maw? Nge, kum hnih zawk? Chelsea tantute hian an nghak thei lo," a ti hmiah bawk.

Defender Thiago Silva pawh a 'mangang' deuh ta a nih hmel riau va, heti ringawt chuan season lehah pawh an dinhmun a ngai reng dawn niin a ngai.

"Kan squad-ah player tha tak tak an awm a, chu chu a lawmawm lam a ni. Hetih rual hian coach-in mi 11 chauh a khelhtir theih avangin lawm lo an awm reng dawn.

"Kan induhtawk a, tih dan/khelh dan (strategy) nghet neia kan kal a ngai, chuti a nih loh chuan season lehah pawh tuna ang bawkin kan tisual leh thei," a ti.