Aizawl; Nimin khan chak zawka tui pump a nih theih nana Tuikhuahtlang Tuizem Sen bula hmalakna hna kal mek chu PHE Minister Zodintluanga'n a hmunah a tlawh. Minister chuan hnathawh kal mek chu sawifiahin, "PHE Deptt.-in hetianga hma an la hi lawmmawm ka ti hle a, a hma chuan Greater Aizawl Water Supply Scheme (GAWSS) Phase I-II hmang hian Tlawng lui tui hi Tuikhuahtlang-ah hian pump chhoh vek a ni a, chuta tang chuan hmun hniam zawk Laipuitlang tiamin, khawl lovin 'gravitation' hmanga tui kaltir a ni a. He system hi a muan avangin tunah hian GAWSS Phase-I Pipe hi Tuikhuahtlang Tuizem Sen bulah hian verhin Laipuitlanga tui pekna pipe-ah hian zawmna siam a ni," tiin a sawi. He hna kal mek hi zaa 60 vel zawh a ni tawh a, "Tunah he hna hi zawh a nih rualin Tuikhuahtlang atanga Aizawl hmar lam tui pekna Chanmari Booster pipe pheiah hian Tlawng atanga Phase-I pipe tui pump hi zawm a nih dawn avangin, Laipuitlang tui lak hi direct-a pump a ni tawh dawn a, hei vang hian a hma aiin Laipuitlanga tui lak hi darkar nga (5) laiin a chak tawh dawn a ni," PHE Minister chuan a ti a. Phase-I pipe leh Laipuitlanga tui lakpheina inzawmna chu Tuikhuahtlang Tuizem Sen bulah a ni dawn a, duh huna zawm loh theih tura siam a ni. Minister chuan tunhnaiah P&E leh PHE Deptt. te thawhho thatna zarah tui pump pawh 7 million per day (MLD) laiin a pung chho tih a sawi a, a hmaa ni khata 12 MLD pump theih chu tunah chuan 19 MLD pump theih a ni tawh tih sawiin, tunah hian Aizawl veng tam takah chuan kar khatah tui hi tum 2 hawtir mek tih a sawi bawk. Laipuitlang tui ringtu Chaltlang leh Ramhlun-ah hian mipui an tam avang in tunah hian Zodintluanga chuan ruahmanna thar an siam tih a sawi a. Pipe line pakhat chauh an rin thin chuan harsatna a siam avangin tunah hian pipe line hrang ve ve ring turin hma an la mek tih a sawi. Tunah hian pipe line hlui tawh tak tak avanga harsatna tawh thut a hlauhawm avangin Minister chuan a tul thuta thlak theih mai turin spare pipe chah turin ruahmanna an siam tih a sawi a. "Tui pipe system hi a muang lutuk a, hei hi tihran kan tum. Tlawng-ah chuan tui a tam tawk a. Kan tui pipe te hi a tet deuh tawh avangin tui pump tam a har a, tui pipe lian zawka tui pump-na pipe te hi thlak turin hma kan la mek," a ti bawk. He hmalakna hi SIPMIU kaltlanga neih a nih tur thu a sawi. GAWSS Phase-I tui Tlawng atanga pump chhohna bulah hian a spare hman loh pipe inang chiah 350mm an phum thu sawiin, "Hei hi kan hmang tangkai dawn a, Seventhday Tlangah hemi hmang hian tui kan pump ang a,Luangmual lam pek nan kan hmang ang," a ti bawk.