Aizawl March 20, 2023: K.Lalrinliana, Minister, Fisheries Department chuan SEDP Pilot Project hnuai a Dumluia 'Chakai Demonstration Farm' kalpui chu awiin chawhma khan a tlawh a.  Chakai farm siam chu eizawnna tlaka hman theih tur a nih thu a sawi.

Minister K.Lalrinliana chuan lui sa zinga mizote ngaih hlut leh ngainat tak chakai chu thianghlim leh hnianghnar zawk tharchhuah a nih theih nan SEDP Pilot Project hnuaia Chakai Demonstration Farm chu kalpui a nih thu a sawi. "He enchhinna hi a hlawhtlin chuan lui dunga nungchate humhalh nana hmanraw tangkai tak a nih dawn bak ah Chakai farm siam chu eizawnna tlaka hman theih tur a ni," a ti. 

Dumluia Chakai Demonstration Farm tlawhna ah hian chakai dah luh zingah no pai mek hmuh a ni a, Minister chuan chakai note te hi hlawhtling taka enkawl chhoh an nih chuan Chakai Demonstration Farm hnuai a hmalakna chu hlawhtling thawkhat ah a ngaih theih thu a sawi bawk. Chakai Farm enchhinna kalpuina chuan hlawhtlinna nasa zawk a hmuh zel theih nan a viltu department leh a hmun enkawltute chuan tihtak zetna nen theihtawp chhuah a thawk zel turin Minister chuan a chah. Enchhinna hi a hlawhtlin chuan ei leh bar intodelhna kawnga mel lung pawimawh tak a nih tur thu a sawi bawk.

DFDO, Kolasib chuan Chakai Demonstration Farm chu enchhina leh zirchianna a nih angin a tum ber chu Cemented pond/tanks-ah chakai vulh theih dan te, an inthlahpun dan, an than dan leh dam leh hrisel tak a vulh an nih theih nana an thil mamawh hrang hrang zirchianna atan a kalpui a nih thu tarlan a ni a. June leh August, 2021 inkar ah leh March 2022 khan hmun hrang hrang atanga chakai lakkhawmte dah luh niin Fisheries Department leh ICAR-a mithiamten endikna te an lo nei tawh a ni.