ZALEN January 17, 2025 : MZP General Headquarters Executive Committee meeting vawi 639-na chu vawiin khan MZP Conference Hall-ah neih a ni a. Meeting-ah hian Free Movement Regime (FMR) hlih chungchang te, MPSC hnuaia hnalak chungchang leh pawl chhung thilte rel a ni.

Meeting chuan, "Tun hnaiah India sawrkar-in Myanmar leh Mizoram inkalpawhna Free Movement Regime (FMR) a ti tawp chu hriatthiam har a tiin pawi a ti a. Zofa chhak leh thlanga cheng, u leh nau, hnam leh sakhua thuhmun, awlsam taka inkalpawhna kawngpui pawimawh tak khar a ni ta hian Zofate inpumkhatna turah nghawng tha lo tak a neih a hlau a ni."

"Tun hnaia Myanmar, Bangladesh leh Manipur buaina avanga Mizorama sa himna zawnga lo tlante theih ang angin Mizoram-in a tuamhlawm mek a. Chutih laiin, Bangladesh atanga Mizorama sa himna zawnga lo lut mi 28 velte Myanmar ram chhungah thawn let an ni chu pawi a tiin a lainat a. Bangladesh atanga dan loa lo pem lut Chakma mi sing tel an en liam mai mai laia, Zofate laka India sawrkar laipui hmalak dan hi hriatthiam a har hle a ni," an ti a. Hemi chungchang hi Union Home Ministry-ah lehkha thawn nise an ti.

Meeting-ah hian Zoram Ni hman dan turte, MZP Kum 90-na lawm dan tur leh MZP Establishment chungchang pawh rel a ni a. Meeting hi President H. Lalthianghlima chuan a kaihruai a ni.