Aizawl; Zirtawpni kalta zan dar 11 vel khan Chaltlang Mualvenga Dr. Ramfangzauva In leh Power & Electricity EE, R Lalchhanhima te In inkarah bomb tihpuah a ni a, thi leh hliam an awm lova, he thu buatsaih lai thleng hian he bomb tipuaktu nia rinhlelh man an la awm lo. He pawikhawihna thleng hi Bawngkawn Police Station-ah thubuai ziahluh a ni a, bomb puak hian R Lalchhanhima te bang tile leh tukverh darthlalangte a tikeh chhe nasa hle a, a chhung lam tile thuahna plywood a chhe nual bawk. R Lalchhanhima te In bang tile hi phek 12 zet thlak ngai khawpin bomb puak hian a tikeh a ni. Hei bakah hian Dr. Ramfangzauva te In chung chhawng lina thlengin tukverh darthlalang a keh nasa hle a, Step lungrem pawh feet khat bial vel a nghawr khawk bawk. Bomb puah hnu lawk hian Bawngkawn Police ten a hmun an thleng nghal a, thil awm dan enfiah nghalin, bomb puahna hmunah hian bomb fuse leh a kep la hman loh chhar tel a ni. Hei vang hian bomb puak hi Gelatine nia ngaih a ni. Police te bakah hian Forensic Expert-te pawh bomb puahna hmun hian kal nghalin a tul angte an enfiah tawh bawk. Thudawn danin, bomb tihpuah a nih hnu hian bomb puahna thlang lama awmte chuan T Shirt var ha mi pakhat tlan an hmu tih an sawi a, hetihlai hian he thu ziahlai thleng hi chuan bomb ti puaktu ni a rinhlelh hi tumah man an la awmlo a, thu zawhfiah atana koh pawh Police lamin an la neilo nia hriat a ni.Bomb tihpuahna bul hnaia khawsa te pawhin han rinhlelh mai tur tumah an hrelo ni a hriat a ni. Kumin chhungin Zirtawp zana bomb tihpuah a nih leh nen hian Aizawl khawpui chhung hmun hrang hrangah tum 4 zet bomb tihpuah a ni tawh a, heng bomb puakte hi Gelatine ni a rin vek niin, vanneihthlak takin bomb puak avang hian mihring thi leh hliam tumah an la awmlo a, hetihlai hian bomb tum 4 zet Aizawl khawpui chhungah tihpuah a nih tawh lai hian, bomb tipuaktu/te man an la awmlo nia hriat a ni. Thudawnna sawi danin, he bomb puak hi Gelatine nia rin a ni a, Police te chuan bomb puakin a tihchhiat hi Rs.1,00,000/- hu vel niin an chhut. Zirtawp zana bomb puak hi kumin (2014) chhunga Aizawl khawpui chhunga bomb tihpuah a nih tum 4-na a ni tawh a, January thla atang khan ni 20 vel danah bomb (Gelatine) hi thlatin vawi khat a la puak ziah a ni. Aizawl Leh Bomb Puak January 30 : Zan a ni a, dar 11 velah Assembly House bul, Treasury Square bazar-ah bomb a puak. February 20 : Zan dar 11:45 velah Aizawl New Market-a sa zawrhna thinah bomb tihpuah a ni. March 22 : Inrinni a ni a, zing khawvar hma deuhin Sinlung Hills Development Council (SHDC) Chairman, Hmingchungnunga In luah kawt, Bungkawn Vengtharah bomb tihpuah a ni. April 18 : Good Friday a ni a, zan dar 10:50 vel khan Chaltlang Mualveng-ah bomb tihpuah a ni.