ZALEN May 7, 2026: July 2025 leh January 2026 chhunga Champhai-a ram dang atanga dan lova cigarette lakluh an man, cheng nuai 200 man hu a chhut chu Controller of Legal Metrology thupek leh District Magistrate hriatpuinain Legal Metrology Office tual, Champhai Vengsang-ah tihchhiat a ni.

Lalbiakfela Addl DC, Champhai chuan, "Dan lova bungrua, a bik takin foreign cigarette lakluh kan do hian, sumdawnna dik lo kan do mai a ni lova, kan thalaite hriselna leh an hma hun kan humhalhna hmanraw pawimawh tak a ni. Heng foreign cigarette-te hi chhiah chawi lova lakluh an nih avangin kan economy tan chhiatna a nih rualin sum leh pai ai maha pawi zawk chu kan hriselna a ni. Heng meizial, flavor hrang hrang neia siamte hi thalaite tan a itawm hle a, a thlum tui vang emaw A rim a tui kan tih kar hian, kan chuap leh kan taksa tana hlauhawm tak tak kan hip lut reng a ni tih kan hriat a, a dona kawnga theihtawp chhuah a tul takzet a ni," tiin cigarette man khawm te hi a ti chhia a ni.

He hun puala inkhawm tawi kaihruaitu V. Lalfakzuala, Assistant Controller, Legal Metrology, Champhai chuan Legal Metrology (Packaged Commodities) Rules 2011 rule 6 leh The Legal Metrology Act, 2009 section 18 in thuneihna a pek angin dan bawhchhiaa lakluh foreign cigarette-te man thin an ni, a ti a. Dan lova lakluh cigarette te'n chhiah an chawi lova, declaration mumal an nei lova, dan hnuaia zawrh chhuah thin cigarette hralhna chena a nghawng avangin man thin an ni, a ti bawk.

Felix Lalruatsanga, Inspector, Legal Metrology, Champhai-in report a pe a, cigarette man te hi packet nuai thum sangkua zasarih sawmpahnih (3,09,712) brand hrang hrang, tualchhung rate-a chhuta cheng nuai 200 man hu a ni a, heng contraband cigarettes te hian Legal Metrology Act, 2009 an zawm loh avangin Rule 19 hnuaia sub rule (4) & (6) Legal Metrology (Enforcement) Rule, 2010 hmangin Controller of Legal Metrology in Disposal order a chhuah hmanga tihchhiat a nih thu a sawi.