ZALEN October 9, 2025: Public Distribution System (PDS) hnuaia mit hmanga inchhihchiahna Iris Scanner hman tan a nih lawmna hun vawiin khan Champhai-ah I&PR Conference Hall-ah hman a ni a, Food, Civil Supplies & Consumer Affairs Director Saizikpuii chu khuallian a ni.

Khuallian Saizikpuii chuan Iris Scanner Champhaia hman tan a ni ta hi lawmawm a tih thu a sawi a, awlsam taka ration lak theihna a nih angin Champhai mipuite'n an hman tangkai ngei nan duhsakna a hlan. District Civil Supplies Officer te, staff te leh retailer te mipuite tana inpe taka thawk turin a chah a, harsatna an neihnaah tanpui hreh lo turin a fuih bawk. Heng bakah hian FCS&CA hmalakna leh hmathlir hrang hrang a sawi bawk a ni.

He hun hi Champhai DCSO CC Sakhawliana'n a kaihruai a, State Project Manager Samuel Vanramthara'n Iris Scanner chungchang leh hman dan tur sawifiahna a nei a ni. Inkawmhona hun hman a ni a, FCS&CA Jt. Director Lalthanmawia'n thu tawi sawiin hun a khar a ni.