Aizawl August ni 5,2024: Higher & Technical Education Minister Dr. Vanlalthlana chuan, “Mizoram-ah state sawrkar din college 20 a awm mek a, chung zingah chuan zirtirtu sanctioned post atanga tehin Govt. Champhai College hi zirtirtu ngah ber dawttu an ni,” a ti.

Vawiin a pisa-a chanchinbumite a kawmnaah H&TE Minister chuan, “Tunah hian Govt. Champhai College-ah Arts, Science, Commerce leh BCA zirna kalpui mek a ni a, Commerce leh BCA erawh self finance mode a kalpui a ni a. Sanctioned post awm zat zirtirtu nei pha lo college 5 an awm laiin Govt. Champhai College hian sanctioned post 44 neiin zirtirtu (regular, contract, RUSA, part time leh casual teacher) 61 an nei a, hei hi sanctioned post atanga teha 138.64% lai a ni,” a ti.

Sawrkarin zirtirtu sem rual (rationalization) kalpui a tum tih sawi bawkin Minister chuan, “Zirtiru sem rual tur hian fimkhur taka zirtirtu leh zirlai awm zat zir chian a ngai a. NEP 2020 in zirna kalpui tura min phut dan thlenga ngaihven a ngai a ni,” tiin zirtirtu sem rual hna chu August, 2024 chhunga peih hman an tum tih a sawi bawk.

Minister Mathlantea chuan Govt. Champhai College chu duhsak an ni tih sawi bawkin RUSA 1, RUSA 2 leh PM-USHA atanga thuam that mek anih bakah zirtirtu dah belh chungchangah pawh a hrana post siam belhna tur thutlukna pawh siam sak an ni tawh niin a sawi bawk.