Aizawl: Champhai District Civil Supply Officer (CDCSO) hnuaia supply kudam 11 a pekchhuah buhfai te chu Rs nuai 326 man a kim loh avangin kudam hrang hrang enkawltute chu pawisa bo hi pe let tura tih an ni. Zalen thudawn danin buhfai kim lohna hi Mimbung leh NE Khawdungsei kudam ah Rs nuai 83.09, Khuangleng kudam ah Rs. nuai 17.90, Tui-puibari kudamah Rs nuai 35.04, Vaphai kudam ah Rs nuai 30.07, Kawlbem kudam ah Rs nuai 65.97, Ngopa kudamah Rs nuai 11.42, Farkawn kudamah Rs nuai 59.32, Vaphai kudam ah Rs nuai 4.47, Biate kudamah Rs nuai 8.43, Kawlbem, Teikhang kudamah Rs nuai 11.12, a vaiin Rs nuai 326.83 a ni. Hemi bawhzui hian CDCSO chuan action lak a nih thu sawiin September 2016 thleng khan Rs. nuai 124.24 an la let thei niin an sawi a, Rs nuai 202.59 lak kir a la ni lo niin an sawi bawk. Thudawn danin Department hian hemi kaihhnawihah hian an department mi 11-te chu an sum pe kir turin a hriattir a, thla tin department-ah sumte hi instalment-a chhung let tur tih niin Rs 4,000 atang Rs 15,000 inkar pe lut turin ruahmanna an siamsak thu tarlan a ni. Thudawn danin heng mawhphurtu department hnathawk 11 zinga 9 chu 01.03.2020 leh 28.01.2035 inkara pension tur an ni a, Rs nuai 37.36 an lak letna tura ruahman hnathawktu pahnih chu an boral tawh bawk. Hemi anih avang hian department hian Rs. nuai 43.89 chauh an la let thei dawn niin thudawnna chuan a tarlang a ni. Department hian sum bote hi hmu kir turin hma an la zel nia thudawn a ni bawk.