ZALEN, October 18, 2025: Lalnghinglova (Tetea) Hmar chuan a department chan pali hnuaiah kum hnih chhungin Champhai district-a hnathawh leh hmalakna Rs. nuai nuai 9,638.84 man kalpui a nih thu a sawi.

Zirtawpni zana Champhaia Hnahsin Kût hman zawh tak chhima a kal rualin Tetea hian Inrinni khan a department chan pali - Sports & Youth Services, Tourism, LESDE leh Excise & Narcotics-a district-a project leh hmalakna hrang hrangte puangin chanchinbu mite a kawm.

LESDE hnuaiah hmasawnna a thleng mek tih sawiin an hmalaknate leh Champhai district puala an thawh chinte a tar lang a; Sports & Youth Services department hnuaiah Mizoram State Sports Council (MSSC) kaltlangin Chhangphut Field-a zana inkhelh theihna siam a nih hnuah New Champhai khelmual chu Rs. vaibelchhe 12 chuanga siam a nih tur thu leh sum a awm tawh thu a sawi.

Excise minister hian Champhai district chu ramria awm a nih avangin ruihhlo leh sorkar phal loh thilin a paltlang nasa a, thawktute an rimin theihtawp an chhuah tih a sawi a; ruihhlo an man zat leh thubuai an siamsak zat atangin an thawh nasat dan a lan thu leh fakawm a tih thu a sawi.

Tetea chuan, "Champhai hian kawng hrang hrangah theihna a nei sang a, a bikin tourism lamah theihna a nei sang takzet a, chu chu Hnahsin Kûtah kan hmu a. Tourism tihhmasawnna turin sorkarin ruahmanna lian tak tak a nei," a ti.

Circuit House, Champhaiah thuthar lakhawmtute hnena a department hmalakna leh hnathawk mekte a puan bakah hian sorkar hotu pawimawhte leh football hruaitute nen hnathawh leh hmachhawpte an tlawh bawk. 

Champhai district-a hmalakna leh hmachhawpte:

1. Heritage & Cultural Centre, Champhai - Rs. nuai 3,387.25 (Swadesh Darshan 2.0 under Ministry of Tourism)

2. Eco-Resort Experience at Keilungliah, Champhai - Rs. 3,885.45 (Swadesh Darshan 2.0 under Ministry of Tourism)

3. Development of Basic Amenities under PRASHAD Scheme, Vangchhia - Rs. nuai 547.32 (Ministry of Tourism)

4. Construction of Artificial turf (football), New Champhai - Rs. nuai 1,201.52

5. December 24, 2024-a Chief Minister Lalduhoma’n a hawn, Chhangphut field floodlight - Rs. nuai 457 (SASCI 2023-24)

6. Hnahsin Kût sponsor: LESDE department atangin Rs. nuai 10 leh tourism department atangin Rs. nuai 3.

7. LESDE department hnuaia Mizoram Building & Other Construction Workers Welfare Board (MBOCWWB) atangin Champhai district-a welfare board member-te puihna Rs. nuai 147.30