Aizawl: Mizoram Journalist Association, Champhai District chuan Zirtawpni kalta khan World Bank sum hmanga Champhai leh Zokhawthar inkar kawng siam mek an tlawh. Tun dinhmunah chuan kawngpui an siam chinah a inthuah tur pali zinga a hnuai ber, compacted subgrade thawh a ni a, kawngpui hi feet 1 leh a chanve vela chhah tur a ni a, kawngpui zauh leh kawng thar sial hna chu tuna an thawh tam zawk niin, kawng zauh hna hi 80% zawh tawh a ni a. Kawngpui km 23.75 atangin km 18.8 chu zauh ngai a ni. Champhai leh Zokhawthar inkar kawngpui hi kum 2014 December ni 26 khan thawh tan a ni a, kum 2018 October thlaa zawhfel tura ruahman niin, Tarmat Limited ten a siam hna hi an thawk a, tunah hian hnathawh tur 42% chu thawh zawh tawh niin, sum ruahman cheng vaibelchhe 137.14 atangin za zela 37 chu hman a ni tawh bawk. He kawngpui siamna avanga compensation leh thildang atana sum an pek chhuah zat chu Rs. 246,599,124 niin vantlang mamawh sawnna atan Rs. 5,530,501 hman a ni tawh bawk a. Kawngpui hrulah hian vantlang ek in 2, zun in 5, bus shed 5 leh bazar 5 te siam tel tura ruahman a ni. MJA te hian Tarmat, Sheladia leh PWD te chu Base Camp-ah kawmin kawngpui siam kawnga harsatna an tawhte sawiho a ni a. A leilungin a zir loh avanga hmun thenkhata leimin te, a tira he kawngpui CTS anga siam tumna chu a theih dawn loh avanga GSB-a thlak a nih thu te tarlan a ni a. Hei bakah hian spar road, Zotlang atanga New Champhai inkar kawngpui pawh tunah hian thawh mek anih thu pawh sawilan niin, kawngpui a tlo theihna tura ruahmanna hrang hrangte MJA te hian Tarmat hnenah hian an thlen a, lo enzui an tiam a ni. Tlawhtute chuan Tarmat Limited hotute chu Champhai leh Zokhawthar inkar chu Champhai atana thil pawimawh a nih avangin uluk taka thawk turin an chah a, fur lai pawhin chawl mai lova hnathawh theih ang thawk chhunzawm zel tur leh, an hnathawh tithuanawp thei harsatna an neih chuan hmalakpui an inpeih reng thu an hrilh.