Aizawl: Mizorama Thalai Inkhawmpui lian ber, Kristian Thalai Pawl General Conference Vawi 56-na chu Ninga zan a\ang khan New Champhai Field-ah hman mek a ni a, zanin hian a tiak ang. Kumin Conference-ah hian thupuiah ‘Pathian Kohhran’ (Mat. 16:18,19) tih hman niin?Speaker atan Rev. Vanlalbela, Bawngkawn hman a ni. A tan zan hian Palai lawm & Report inkhawm hman a ni a. General Secretary Report, Finance Report leh Bial Report khaikhawmnate ngaihthlak a ni a. Rev. B. Sangthanga, Executive Secretary i/c KTP chuan KTP Kum Puan 2016-2017 ‘Pathian nêna lendun’ chu hlanin a hawng a ni a. Upa H.Ronghaka, Synod Secretary-in Synod Choir Music Video thar ‘Lal A Ni’ tih chu a tlangzarh bawk. Zirtawpni chawhma khan Synod Moderator Rev. H.Lalrinmawia kaihhruaiin 2016-2018 CKTP Hruaitu tur thlan a ni a, a hnuah Champhai Vengthlang Kohhran Biak Inah Rorel Inkhawm neih a ni. Rorel inkhawm hlan hian Pandal-ah Ramthar hawi programme hman a ni a, Rev. P.C. Lalropuia, Kolkata hnen atangin Pathian thuchah ngaihthlak a ni a. Chawhnuah Zaikhawmpui neih a ni bawk. Zirtawp zan khan Pathian biak inkhawmah Synod Moderator-in thuchah a sawi a, inkhawm banah Fellowship a awm zui a, Hun hman thiam (Time Management) tih thupui hmangin Dr. Lalliansanga, Asst. Secretary hnen atangin thuchah tawi ngaihthlak a ni. Nimin chawhma khan ‘Rilru Hrisel’ tih thupui hmangin T.Upa Dr. C.Lalhrekima, Mission Vengin thuchah a sawi a. Chawhnuah Variety Programme hman a ni a, Upa K.Rorelkima, Committee Member hnen atangin thuchah tawi ‘KTP, Kohhran kutke’ tih thupui ngaihthlak a ni. Nizan atangin Speaker-in thupui a sawi tan a. Inkhawm banah Fakna Inkhawm neih zui nghal a ni bawk. Vawiin chawhma leh chawhnu inkhawmah Speaker-in thuchah a sawi leh a. Zan inkhawmah hian Synod Moderator-in hruaitu thar a hlan ang a, Rev. J.Lalremsiama, CKTP Leader kalchhuakin thuchah a sawi ang. Zan inkhawm banah hian Fellowship neih leh a ni bawk ang.