ZALEN, November 26, 2025: 2014–15 I-League leh 2015 Indian Super League (ISL) nomawi lo la tawh, Indian striker hlui, Jeje Lalpekhlua chuan champion harzia a hria a, Mizo rawltharte National Junior Badminton Championship 2025-a boy’s team champion an ni chu a lawmpui tak zet tih a sawi.

South Tuipui bialtu MLA hian Thawhlehni tlai khan tun hnaia Arunachal Pradesh-a Yonex-Sunrise 48th Inter State - Inter Zonal & National Junior Badminton Championship 2025-a Mizoram boy’s team-in nomawi an lak lawmna hun chu khual lian niin a hmanpui.

Mizoram Badminton Centre, Zuangtui, Aizawla player-te hmuahna leh lawmna hun buatsaihah Jeje-a chuan, “Inkhel mi ka nih angin champion hlutzia leh harsatzia hretu ka ni a, hetiang nomawi hawn thei player leh coaching staff-te ka lawmpui tak zet a ni,” a ti a, tha thlah lova kal zel turin a fuih bawk.

India tana goal 23 thun thei chuan Mizo shuttler leh la naupang zawkte fuihin an zawng zawng chhuah turin a chah a. Football a khelh laia amah fuihtu sawiin, “Tum khat chu kan coach-in, ‘Ni khatah darkar li vel kan training thin a, a bakah eng nge in tih thin?’ tiin min zawt a, ka harh zawk a. Darkar 24-a darkar li bak hun kan hman dan hi a pawimawh,” a ti.

“Court chhungah chauh em ni kan intuaihriam thin? Hlawhtling tur chuan a bak hun dang leh hmun danga kan hun hman dan a pawimawh em em a ni,” tiin 2015–16 FPAI Indian Player of the Year and the AIFF Men's Player of the Year Award dawngtu chuan a fuih.

Jeje-a hian champion nomawi hawntu Mizoram boys' team chu lawmpui nan Rs. 50,000 a hlan nghal a. Mizoram Badminton Association (MBA)-in player pasarihte chu Rs. 20,000 theuh hlanin coach leh manager hnenah Rs. 10,000 ve ve an hlan bawk.

Kar kal taa Itanagar khawpuia Badminton Association of India (BAI) hnuaia zone panga awma champion theuh leh inelna thlengtute inelnaah hian Mizo rawltharte hi North East Zone champion an nih avanga inlanin final-ah 2-1-a East Zone champion, Delhi hnehin an champion a ni.

Champion lawmnaah hian team chuan an nomawi hawn leh lawmman an dawn, Rs. 3,50,000 chu MBA hnenah an hlan ve bawk.

MIZORM TEAM: 

1. H. Lalthazuala, Chanmari West, Chanmari Shuttlers Club

2. C. Lalramsanga, Durtlang, Mission Veng Badminton Club

3. Sainunmawia Sailo, Ramhlun Venglai, Sihphir Badminton Club 

4. Malsawmhlua, Serchhip P&E Veng, New Serchhip Badminton Club 

5. Vanlalmalsawmzuala, Serchhip, New Serchhip Badminton Club 

6. Vanlalpekhlua Sailo, Serchhip, Chaltlang Badminton Club 

7. Vanlalhruaia Sailo, Serchhip, Chaltlang Badminton Club 

Manager: Dr Malsawmkima, Mission Veng 

Coach: Lalhlimpuia, Mission Veng