48th Sub Junior National Basketball Championship-ah champion lai, Mizoram chuan an khelh hmasak berah Maharashtra an sawp nghal.

Puducherry-a Ningania inelna tanah hian Mizoram hi Group A-ah awmin Maharashtra rawlthar rual chu 64-13 zetin an sawp nghal a ni.

Mizoram hian Zirtawpni zingah Uttar Pradesh an hmachhawn lehnghal dawn a, Inrinniah Kerala an hmachhawn zui bawk ang a, an group-a awm, Karnataka chu an inlan loh avangin group stage an khel zo ang.

Maharashtra an sawp hnuah Uttar Pradesh an hmachhawn leh tur pawh hi an huphurh lem lo tih Mizoram team manager, Raymond Lalengkima chuan a sawi.

“An sang a, san zawngah chuan keini nen chuan inthlau deuh ngei a; mahse, skill hrim hrimah chuan kan huphurh lo,” a ti a. Game a ni a, khelh fuh loh ni leh kut kal loh riau tum a awm thin a; mahse, dan pangngaia an khelh theih phawt chuan an hneh theih ngei an ring tih ZALEN a hrilh.

Mizoram player 12 zingah damsam lo an awm nual tih manager chuan a sawi bawk a, “Khaw lum dan leh boruak a inthlak nasa a, tunah hian kan squad-a mite kim thapin kan la che thei lo deuh va; mahse, kan dam that zel kan inbeisei,” a ti.

Maharashtra an hmachhawn tum pawh hian C.Lalfakzuala chu a intina deuh niin a sawi a; mahse, ngaihtuahawm erawh a ni lo.

Mizoram hi champion lai an ni a, he intihsiaknaah hian kum hmasa lama chet that dan ang zela ranking siam a nih thin avangin Level A-ah a awm a, hei vang hian group stage khelh mekah hian Mizoram hi che tha lutuk lo pawh ni se an tlak nghal theih loh dan a awm.

Group stage zawh hnuah knock-out round-ah pawh an inlan nghal mai dawn lo va, level hniam zawka mite inkhelin a chak chho zelte nen an la inhmachhawn dawn chauh a ni.

Sub Junior National Basketball Championship hi Basketball Federation of India-in state hrang hranga kum 14 hnuai lam, hmeichhia leh mipa inelna atana a buatsaih thin a ni a. Kuminah hian Puducherry-in thlengin Mizoram hian mipa team a tir a ni.

MIZORAM TEAM:
Player:
1. Samuel Vanlalpeka, Kulikawn west
2. B Lalruattluanga, Tuikual south
3. Emmanuel Lalpekhlua, Republic veng
4. Stephen C Lalhruaitluanga, Aizawl venglai
5. Jacob C Vanlalruatdika, Khatla south
6. Ronie Vanlalawmpuia, Bungkawn
7. Joel Lalbiakhlua, Khatla south
8. K Lalsangzela, Zarkawt
9. PC Lalruatfela, Dawrpui vengthar
10. Reagan Zohmingsanga, Mission veng
11. Lalrinchhana, Kulikawn west
12. C Lalfakzuala, ITI veng

Manager: Raymond Lalengkima, Khatla South
Head coach: Marc Lalthlamuana Sailo, Zarkawt
Assistant coach: Z.D Denghmingliana, Kanan veng