Nomawi an lak hnuah Mizo tlangval, Lallianzuala Chhangte leh a thiante chu chawl hmanin an la khawsa lo va, Pathianni zana an champion-na aia lian zawk intihsiakna an hmachhawn leh nghal dawn a, inbuatsaihna an kalpui lehnghal.

Kum 26 mi, Lza Chhangte hi Nilaini tlai atang khelh tan tur, 2023 SAFF Championship-ah India tan a inlan zui lehnghal dawn a. Thawhtanni tlai khan a social media account atangin, “Bengaluru-ah kan inhmu leh dawn nia,” tiin amah zuitu (follower)-te a hrilh.

Pathianni zana Hero Intercontinental Cup final-a India tana goal khat thawk chhuaka goal khat dang thun bawktu, Lza chuan Lebanon hneha an champion chungchang pawh tar langin, “Mi mal tinten tum inang kan nei a, chumi tihlawhtling tur chuan engkimah kan theihna zaa za kan pe theuh. Tute pawh kan pawimawh vek tih kan chiang a, mawhphurhna pawh kan la vek. Mi mal thil tum chauh a ni lo va, kan vaia thil tum leh duh a ni tih kan hria a, chumi chuan he team hi a tihlu lehzualin ka hria,” a ti.

Intercontinental Cup an khelhna, Odisha khawpui, Bhubaneswar chungah lawmthu sawiin, “Kan hnehnaah hian Pathian ropui ber rawh se,” a ti bawk.

Social media-a thu a post-ah hian Mumbai City FC winger Lza chuan inelna an hmachhawn leh turah an inbuatsaih thu pawh tar langin, “A lehpeka kan hmachhawnna turah rilru kan dah leh tawh a, Bangalore lamah kan inhmu dawn nia,” a ti. 

Darkar khata km 35.80 zeta chaka tlan thei, a tlan chak theih em avanga a hming lemah pawh ‘Mizo Flash’ tia an sawi thin, Lza hi Pathianni zana Intecontinental Cup final-ah khan Hero of the Match atan thlan a ni a, India a champion-pui.

Tournament-ah khan vawi li khelin team tana tangkai tak a ni vek a, goal hnih a thun a, final-a a siamsak atanga India goal hmasa zawk thuntu, Sunil Chhetri nen goal thun tam ber an ni.

Tunah erawh chuan Asia khawmualpui chhim lam ramten kum hnih dana an khelh thin, South Asian Football Federation (SAFF) Championship khel turin Karnataka khawpui lam an hawi leh tawh a. Kuwait leh Lebanon sawm belh niin ram pariatin an inchuh dawn.

Champion lai leh a thlengtu, India hi Group A-ah awmin Kuwait, Nepal leh Pakistan nen an awm ho va. Nilaini zan hian Pakistan hmachhawnin bul an tan dawn a ni.

Inkhel zawng zawng hi Sree Kanteerava Stadium, Bengaluru-ah neih tur niin group khata awmte an inkhelh kual chhuah hnuah a sang pahnih ve vein semifinal an lut dawn a. July 4-ah final an khel dawn a ni.