Aizawl: Chief Minister Lal Thanhawla chuan Zirtawp tlai khan a chenna Bangla-ah Mizoram Motorsports Association(MiMSA) hruaitu te leh Mizo tlangval 2, Coimbatore a neih zawh tak a Champion Rider Lalhruaizela leh pahnihna Lalnunsanga te chu thingpui a inpui. Chief Minister chuan harsatna tam tak paltlang a, inpekna thuk tak, tumruhna leh taihmakna nena hlawhtlin tum tlat hmuh tur an awm chho zel chu lawmawm a tih thu a sawi a. "Sawrkar pawh in hetiang a mi tumruh, tanlak nachang hria Mizo thalaite te chu a hlawhtlinna atanga hlawhtlin lehzualna an hmuh theih nan theih tawp chhuahin a pui zel dawn a ni," a ti a. Riders hlawhtling te chu hlawhtlinna lian zawk thawkchhuak tura duhsakna hlan in Zofate ti hmingtha turin a chah. RedBull Road To Rookies, Coimbatore, Tamil Nadu a neih zawh tak a champion Lalhruaizela hi Spain ramah RedBull Rookies Cup Qualifying tlan tur in October thla khian a kal dawn a; a mah dawttu Lalnunsanga tan pawh, ram pawn lam a kalna tur kawng a inhawng tura rin a ni.