UEFA Champions League-ah hian team tha bik 32 an inlan thin a, kum tin Europe league lian te atangin a tha thlan chhuah ten an khel thin a, player ten an ngaihlu hle.  Club football inelnaah hi chuan Champions League aia ngaihhlut a awm lo. Hetiang a nih avang hian match hmuhnawm leh hriat reng tawh tur a thleng fo thin. Beisei loh tak result te leh inlehthalna pui tak tak he compeition-ah hian  hmuh tur a awm zauh zauh. 

AC MILAN VS LIVERPOOL, 2005 CHAMPIONS LEAGUE FINAL
 AC Milan vanglai a ni a, kum thum chhunga a vawi hnih nan final an lut. An player enin leh an chet thin dan ngaihtuahin champion ngei tura beisei leh rin hlawh zawk an ni. Kum 20 hnua an vawi khat UCL final luhna Liverpool lam pawh zuamawm tak an ni bik chuanglo. Inkhelh tan tirh teah Paolo Maldini chuan goal thun nghalin AC Milan lamin hma an hruai.    

Half-time a nih chuan Liverpool lamin goal thum an phur der tawh. Kum 20 hnua UCL champion theihna hun tha nei Reds fans lam phurna a chuai a, champion chu sawi loh mualpho taka an haw an inring mah tawh zawk. Chutih laiin, Milan fans leh player te chuan champion tawh turah an inngai a, UCL chawi turah riak an inngai. 

Mahse, football game-ah chuan hun tawp hamrik a rik hma chuan chak zawk a sawi theih loh an tih thin angin Benitez-a nau ten tlawm mai an tum lo. Hun tawp hma minute ruk a la awm tihin Liverpool lamin an si thum phurh an sut ta vek mai.    

Beidawng tawh Reds fans an phur thar a, champion tawh a inngai Milan fans te an hlauthawng tan. Extra time an khel a, hun a tawp chak zawk bik awm lovin 3-3 a ni a, penalty pet a ngai ta.    

Dudek an ropui takin Shevchenko-a penalty pet lo dan sakin tlawm tawh tura ngaih Merseyside club te an chak a, a hun laia team ropui ber pawl hnehin UCL trophy an chawi. First-half-a goal thuma hmahruaitu Milan tan chuan hriatthiam a harsa khawp ang le.    

Liverpool-in ropui taka AC Milan an lehthal thei hi mi mak tih a hlawh a, Miracle of Istanbul an tih hial he match hi Champions League history-a final hmuhnawm leh ropui ber an ti hial thin.

MAN UNITED VS BAYERN MUNICH, 1999 CHAMPIONS LEAGUE FINAL
    Hemi kum hian Manchester United leh Bayern Munich te chu an ram league-ah an champion ve ve a, club pahnih hian treble champion nih theihna hun tha tak an nei ve ve bawk. Club pahnih tan hian zan danglam leh pawimawh tak a ni a, a bikin Manchester tan hian a chhinchhiah tlak leh zual. Kum 1968-a Champions League-a Red Devil champion puitu an manager Sir Matt Busby kum 90-na piancham a ni a, hemi hnu hian an la champion leh lo.
   

Bayern Munich lam hian ropui takin bul an tan a, Mario Basler-a free-kick fing tak hmangin goal an thun a, Kasper Schmeichel-a tan man ngaihna a awm lo. Bavarian lamin game an thunun chhunzawm a, vannei deuh phei seng chuan goal an thun belh ngei ang. 
   

Minute 90 an khel tawh a, goal khat a hmahruai mektu Bayern player tan chuan chak rim a nam tawh ngei ang. United player lam erawh beidawn mai an tum lo. Minute 91-naah Teddy Sheringham chuan an siphurh a rawn sut a, tichuan United lam an phur thar zual. Inkhelh hamrik ham tawp hma minute 93-ah Ole Gunnar Solskjaer chuan Camp Nou muala entu mipui 90,000 te barakhaihin an chakna goal a rawn thun ta hlauh mai le. Hun tawp hamrik a ri chiah chu Bayern player te tan chuan vanpui a chim a ni hawt a! Minute thum hma lama trophy chawi tawh tura inngai Bayern Munich player te chu mual chhungah rilru na-in mittui nen an indawm kun tlawk tlawk ta zawk a ni. Barcelona muala rilru na taka an indawm kun hnu, kum hnih hnuah Valencia hnehin Bayern chuan an European Cup tum lina an chawi ve leh.