UEFA Champions League hi Europe ram hrang hrang club tha te inelna a ni a, lawmman a san bakah Europe champion anga ngaih an nih vangin ngaihhlut a hlawh hle a ni. Ram hrang hrang club inel an nih vang hian club tel te pawh an inlen hleih thei hle a, chuti chungin beisei loh taka inhnehna mak danglam tak tak pawh a thleng ve fo tawh thin. Club tha leh hausa te fuan khawmna hmun a nih vang hian khawvel footballer tha ber ber te pawh hian Champions League khelh hi an chak vek a, Champions League-a an chet that chuan an hming pawh an chherin  an langsar thuai thin. 

Inkhelhah chuan penalty hlawhchhuah hi a lawmawm rualin a chawi tute lam tan erawh a huatthla la hle thin thung a, mahse penalty zawng zawng erawh pet luh a ni vek lo thung. Goal keeper tam tak hi chuan lehlam pawl atanga an penalty chhuih thintute chu lo zir chiangin an dan sak fo va, chuvangin penalty hi goal chiang anga sawi theih a ni ngaw lo. Keeper vannei chuan an petna lam tur risk fuhin player tha tak tak te pet pawh an dan sak fo thin vangin penalty hi 50/50 ang pawhin a ngaih theih.  

Champions League chanchina penalty hlah tam player 10 te i han bih chiang dawn teh ang: 

#4 Eden Hazard, Daniel Parejo, Radamel Falcao - 3
   

Eden Hazard hian England club tha Chelsea-a a khelh laiin tum tam trophy a chawi tawh thin a, kum 2019 khan Real Madrid a zawmin a che ropui zui lo hle thung. Belgium tlangval hian kum 10 chhungin vawi tam Champions League a khel hman a, mahse he competition-ah hian record duhawm lutuk lo a hnutchhiah ta hlauh thung. Champions League game-ah hian tum 58 inlan tawhin goal 9 a thun a, penalty vawi 3 a hlah tawh bawk. 
   

Daniel Parejo pawh hi La Liga lama midfielder che na pawl tak a ni a, mahse a ni pawh hi penalty lamah a vannei lutuk bik lo va, Champions League bikah hian vawi thum zet penalty a hlah ve tawh bawk. Spaniard hi player talent nei tha tak niin Spain tana player pawimawh a ni a, competition lian tak takah thangkhat lian dawn a khel tawh bawk. Kum 2020-a Villarreal a zawm hma khan Valencia tan kum 9 zet a khel hman a, Champions League-ah game 35 inlan tawhin goal hnih a thun tawh. 
   

Radamel Falcao hi tunah chuan Rayo Vallecano tan a khel mek a, a vanglai chuan khawvel striker tha ber zinga sawi ve thin a ni. Colombian international hi Atletico Madrid-a Diego Simeone hnuaia a khelh lai kha a ropui ber lai a ni. A club hi Europa League lamah pawh a hlawhtlin pui hle a, Champions League lamah erawh ropui takin a inlan hran lo. AS Monaco tana kum 5 chhung a khelh kha a hming thang vanglai ber chu a ni awm e. Falcao hian Champions League game 32 khelin goal 14 a thun a, penalty tum 3 a hlah ve tawh bawk.

#3 Cristiano Ronaldo, Luis Figo, Thomas Muller - 3
   

Cristiano Ronaldo hi Champions League chanchina goal thun tam ber a ni a, game 181 a khelh-ah goal 140 zet a thun tawh. UCL trophy hi tum 5 chawi tawhin hei pawh hi record a ni. Portuguese legend hi Sporting CP, Real Madrid, Juventus leh Manchester United-ah a khel kual tawh a, heti zo zai goal a thun lai hian penalty vawi 3 chu a hlah ve. Tunah hian player goal thun thei tak niin a la khelh mek bawk vangin a record tha leh chhia hi a danglam thei a ni. 
   

Kum 2004 bawr vel khan Portugal player zingah Ronaldo aia hming langsar a awm a, chu pa chu Luis Figo a ni. Figo hi centre-forward a tlan thin niin Sporting CP, Real Madrid, Barcelona leh Inter Milan-ah te khel kual tawhin kum 2009 khan football khelh a chawlhsan a ni. A vanglai chuan striker hlauhawm ber pakhat niin Champions League bik hi game 103 khelin goal 24 a thunin penalty tum 3 a hlah a ni.
   

Thomas Muller pawh hi Champions League khel tam ber pawl a ni a, German international hian Bayern Munich-ah kum rei tak a khel tawh tawh a, Champions League trophy pawh tum hnih chawi tawhin game 132 khelhah goal 50 a thun a, record tha tak a ni a, mahse penalty tum 3 a hlah thung. Tun season hian a record a la danglam thei bawk a ni. 

#2 Ruud van Nistelrooy, Sergio Aguero - 4
   

Ruud van Nistelrooy hi kum 2000 bawr vela khawvel striker tha ber pakhat a ni a, he centre-forward pa sang tak hian ball a chang fuh theih hle a, khawvel defender tha ber ber te alo paltlang ve nual tawh a ni. Heerenveen, PSV, Real Madrid, Manchester United, Hamburger SV leh Malaga tan a khel kual tawh a, kum 2012 khan a ballboot alo khai ve tawh a ni. Kum 15 chhung professional football a khelh chhung khan Dutchman hian Champions League game 73 khelin goal 56 zet a thun thei a ni. Goal a thun tam hle chung hian vanduaithlak takin tum 4 zet penalty a hlah thung. 
   

Hmani deuh maia fooball chawlhsan Argentina striker Sergio Aguero hi Premier League chanchin-a player chetha ber pakhat niin Champions League no mawi erawh a chawi lo thung. Argentinian legend hi goal hmaah chuan player hlauhawm ber pawl ni thinin UCL competition bikah game 79 khelin goal 41 a thun a, penalty erawh vawi 4 a thun lo thung a, he vang hian Champions League history-a penalty hlah hnem ber pahnihna a nih phah a ni. 

#1 Lionel Messi, Thierry Henry - 5
   

Lionel Messi hi khawvel footballer piang tawh zinga thiam ber a ngaitu an thahnem hle awm e. South American star hian Barcelona lamah bul tanin hming a chhe fe hnuah nikum khan rin loh deuhin Paris Saint-Germain a zawm a nih kha. Champions League game 155 a khelha goal 125 zet thun thei Messi hi he competition bikah hian a el pui ber Ronaldo tih lo va goal thun tam ber pahnihna a ni. Goal thun lamah Cristiano Ronaldo-a aiin record nei chhe zawk mah se penalty hlah tam lam erawh khumin vawi 5 zet a hlah tawh thung. A penalty hlah hnuhnun ber chu tun season Round of 16-a Real Madrid laka a hlah kha a ni. 
   

Messi tih lova penalty hlah hnem ber pakhat chu Thierry Henry a ni. Thierry Henry hi Premier League player ropui ber pawl niin Champions League lamah pawh a che chhe lo hle. France international hi Arsenal tan ropui takin a khel thin a, a hun hnuhnung lamah Barcelona tan a khel thung. A che vel leh a finishing tha em vanga lar Henry hian Champions League game 113 khelin goal 50 a thun a, penalty vawi 5 a hlah a ni.